Catholic Nisim Lungdamna Laisiangtho. Zehtan hun Nipi Kaal (3) Na. 7.3.2024(Thurs)

Luke 11:14-23
14. Tu-in Jesu in a pau thei lo mi khat sung pan dawi khat a hawlkhia hi. Tua dawi a paikhiat ciangin a pau thei lo pa pau thei a, mihonpite in lamdang a sa mahmah uh hi.

15. Ahi zongin amaute kimkhat in, “Amah in dawite a ukpa Beelzebul suangin dawite a hawlkhia hi,” a ci uh hi.

16. A dangte in amah a ze-etna-un vantung panin lim lamdang a ngen uh hi.

17. Ahi zongin Jesu in amaute’ lungsim sunga a ngaihsutna uh thei-a amaute’ kiangah, “Gam sung mi kilem loin a kikhen gam, kisia ding hi. Innkuan sung zong kilem kei leh, kisia-in a puk ding hi.

18. Keimah in Beelzebul suangin dawite ka hawlkhia hi, ci-in note in nong gen manun Satan, amah le amah kilangpang leh ama gam bangci kip theih ding ahi hiam?

19. A zenzenin keimah in Beelzebul suangin dawite a hawlkhia ka hih leh, na nungzuite un kua suangin dawite hawlkhia uh ahi hiam? Tua ahih manin amaute in note thu hong khente ahi ding uh hi.

20. Ahi zongin Pasian’ khutme tawh dawite ka hawlkhiat leh Pasian’ gam note’ tungah hong tung zo hi.

21. Mi thahat khat in hiam tawi-in ama inn a cin ciangin a neihsate a bit hi.

22. Ahi zongin ama sangin a hatzaw mi hong pai-in amah a zawh khit ciangin, amah in a muan a hiamte a sut ding hi, tua khit ciangin a neihsate laksakin a hawm ding hi.

23. Kei hong pawlpih lote in kei hong langpang hi a, kei hong kaihkhoppih lote in a thehthaang ahi hi.

Hi in Topa' Lungdamna Laisiangtho ahi hi.