Catholic Nisim Lungdamna Laisiangtho. Zehtan Hun Nipi Kaal (3) Na. 17.3.2023(Fri)

Mark 12:28-34
28. Tua laitakin lai siangtho siamte’ lakah khat va pai a, amaute kam kinialna a za hi. Jesu in amaute hoihtakin a dawn theih lam tua pa in a theih ciangin, “Pasian’ thupiak khempeuh lakah a masa pen in bang ahi hiam?” ci-in amah a dong hi.

29. Jesu in, “A thupi penpen thupiak in hih ahi hi: ‘Israel aw, ngai in: eite’ Topa Pasian in Topa khat bek ahi hi.

30. Na Topa Pasian, na lungsim khempeuh, na kha khempeuh, na pilna khempeuh, na thahatna khempeuh tawh na it in.

31. Pasian’ thupiak a nihna in, ‘Nang le nang na ki-it bangin na vengte it in, cih ahi hi. Hih Pasian’ thupiakte sangin a lianzaw thupiak khat beek om lo hi,” ci-in a dawng hi.

32. Tua khit ciangin lai siangtho siampa in, “Sia aw, na gente ahi takpi ahi hi. Pasian khat bek hi a, amah longal Pasian dang om lo hi, na cih a man hi.

33. Na lungsim khempeuh, na pilna khempeuh le na thahatna khempeuh tawh amah it ding le nang le nang na ki-it banga na vengte na it ding pen meihal biakapna buppi le biakpiaknate’ sangin a thupizaw hi,” a ci hi.

34. Tua pa in pilna tawh a dawnkik Jesu in a theih ciangin ama kiangah, “Nang in Pasian’ gam tawh na kigamla kei hi,” a ci hi. Tua-a kipan kuamah in bangmah a dong ngam nawn kei hi.

Hi in Topa' Lungdamna Laisiangtho ahi hi.