Catholic Nisim Lungdamna Laisiangtho. Topa Jesu hong kilahna Pawi. 7.1.2024(Sun)

Matthew 2:1-12
1. Kumpipa Herod a man laitakin, Judea gam Bethlehem khua ah Jesu a suah khit phetin nisuahna lam pan Jerusalem ah mipilte hong tung uh a,

2. “Jew mite’ kumpi dinga hong suak naungek koi lai-ah om ahi hiam? Bang hang hiam cih leh nisuahna lamah ama’ aksi hong kilang ka mu uh a, amah a bia dingin hong pai ka hi uh hi,” a ci uh hi.

3. Kumpipa Herod in hih thu a zak ciangin, lunghimawh mahmah a, Jerusalem mite khempeuh zong a lunghimawh uh hi.

4. Amah in siampi makaite le mipite laka lai siangtho siamte khempeuh kaikhawm a, Messiah hong suahna ding mun amaute a dong hi.

5. Amaute in ama kiangah, “Judea gam Bethlehem khua ah hong suak ding hi, bang hang hiam cih leh kamsangpa in hih bangin na gelh hi:

6. ‘Judah gam sunga om nang Bethlehem aw, Judah gam a ukte lakah a neupen na hi kei hi; bang hang hiam cih leh na sung panin ka mi Israel mite a cing a kem dingin ukpa khat hong pai ding hi.’ ” ci-in a dawng uh hi.

7. Tua khit ciangin Herod in mipilte samsim a, aksi kilat hun kician takin a dong hi.

8. Tua khit ciangin amah in amaute Bethlehem khua ah sawl a, “Pai unla, tua naupang limtakin va zong un; amah na muh uh ciangin kei zong pai-in amah ka biak theihna dingin kei thu hong zasak un,” a ci hi.

9. Amaute in kumpipa’ thugen a zak khit uh ciangin, paikhia uh a, a muhsa uh aksi mah naungek’ omna tungsan ah a khawl matengin amaute makaihin a mai-ah a pai hi.

10. Amaute in aksi a khawl a muh uh ciangin, a lungdam mahmah uh hi.

11. Inn sungah a lut uh ciangin, naungek le a nu Maria* mu uh a, khukdinin a bia uh hi. Tua ciangin a vante uh hongin kham, lawban le myrrh a pia uh hi.

12. Tua ciangin Herod kiangah a kihilkik lohna dingun a mang sung uh ah kihilh ahih manin lampi dang tawnin a gam uh ah a ciah uh hi.

Hi in Topa' Lungdamna Laisiangtho ahi hi.