Catholic Nisim Lungdamna Laisiangtho. Thawhkik Pawi Nipi Kaal (5) ni. 28.4.2024 (Sun)

Jn15:1-8
1. Jesu in, “Keimah in leenggahgui taktak ka hi a, ka Pa in leenggah gui lo neipa ahi hi.

2. Kei’ tungah a gah lo hiang peuhmah a sattan ding hi. A gah hiang khempeuh tampi a gah semsemna dingin heuhin a hahsiang ding hi.

3. Ka thuhilhna hangin note in na siangtho khin ta uh hi.

4. Kei’ sungah om un. Keimah in zong note’ sungah ka om ding hi. Leenggah hiang in guipi’ tungah a kizop kei leh, ama utthu-in a gah theih loh bangin, note zong keima sungah na om kei uh leh na gah thei kei ding uh hi.

5. Keimah in leenggahgui ka hi hi, note in a hiang na hi uh hi. Mi khatpeuh kei’ sungah om a, ama sungah kei ka om leh tua mi in gah tampi a gah thei ding hi. Bang hang hiam cih leh, kei’ sungah na om kei uh leh, bangmah na hih thei kei ding uh hi.

6. Mi khatpeuh kei’ sungah a om kei leh amah in a kipaimang a hiang tawh kibang ding hi. Tua a hiangte a keu ciangin mite in kaikhawmin mei sungah a khultum ding uh hi.

7. Note in kei’ sungah na om uh a, ka thute note’ sungah a om leh, na deih peuhpeuh uh ngen un; tua nate hong kipia ding hi.

8. Note in gah tampi na gah uh a, ka nungzuite na hihna uh hangin ka Pa’ minthanna a kilang ding hi.

Hi in Topa' Lungdamna Laisiangtho ahi hi.