Catholic Nisim Lungdamna Laisiangtho. Thawhkik Pawi Nipi Kaal (5) na. 1.5.2024 (Wed)

Mt 13:54-58
54. Jesu in a khanna khua a tun ciangin kikhopna inn sungah mipite thu hilh ahih manin amaute in lamdangsa uh a, “Hihpa in hih bang pilna le hih a lamdang vangliatnate koi panin ngah ahi hiam?

55. Amah in khut siampa’ tapa hilo ahi hiam? A nu Maria a kici-nu hilo ahi hiam? James, Joseph, Simon le Judas-te ama sanggamte(b) hilo ahi uh hiam?

56. A sanggam numeite zong eite tawh omkhawm hilo ahi uh hiam? Tua ahih leh, amah in hih thute khempeuh koi pan ngah ahi hiam?” a ci uh hi.

57. Tua hi a, amaute in amah a thusim kei uh hi. Ahi zongin Jesu in amaute’ kiangah, “Kamsangte in amau khua le amau inn simloh mundang teng ah zahtakna a ngah uh hi,” a ci hi.

58. Amaute’ uplahna hangin tua lai-ah na lamdang tampi bawl lo hi.
Hi in Topa' Lungdamna Laisiangtho ahi hi.