Catholic Nisim Lungdamna Laisiangtho. Siangtho Nili Ni. 28.3.2024(Thur)

John 13:1-15
1. Tu-in Paisan pawi ma-in hih leitung nusia-in Pa’ kiangah a ciah ding hun hong tung ta, cih Jesu in a theih ciangin, hih leitunga om ama mite a itna tawh kizui-in amaute a tawp dongin a it hi.

2. Nitak-an nek laitakin dawimangpa in Simon’ tapa Judas Iscariot’ lungsim sungah Jesu a lehhekna ding a guan hi.

3. Pa in na khempeuh ama khut sungah pia a, Pasian’ kiang pan amah hong pai-in, Pasian’ kiangah a ciahkikna ding thute, Jesu in a thei hi.

4. Amah annekna pan dingkhia a, a puantungsilh suahkhia-in dial khat a kawngah a vial hi.

5. Tua ciangin kuang sungah tui sungin a nungzuipite’ khe silsak a, a kawnga a vialh dial tawh a nulsak hi.

6. Amah, Simon Peter’ kiang a tun ciangin Peter in, “Topa aw, ka khe hong silsak ding na hi hiam?” a ci hi.

7. Jesu in, “Tu laitak a ka hih thu na thei kei hi. Ahi zongin nung ciangin na thei ding hi,” ci-in a dawng hi.

8. Peter in Jesu’ kiangah, “Ka khe na sil peuhmah kei ding hi,” a ci hi.Jesu in, “Na khe ka sil kei leh kei tawh a kipawl lo na hi hi,” ci-in a dawng hi.

9. Tua ciangin Simon Peter in Jesu’ kaingah, “Topa aw, ka khe bek hi loin ka khut le ka lu zong hong silsak in,” a ci hi.

10. Jesu in ama kiangah, “A kisilsate in a pumpi-un siangtho khin uh ahih manin a khe simloh sil ding kisam lo hi. Note na siangtho uh hi, ahi zongin na vekpi-un na siang kim kei uh hi,” ci-in a dawng hi.

11. Bang hang hiam cih leh a lehhek dingpa theikhol ahih manin, “Note na vekpi-un na siang kim kei uh hi,” a ci hi.

12. Jesu in amaute’ khe a silsak khit ciangin a puantual silh a, a tutna munah a paikik hi. Amah in amaute’ kiangah, “Note’ tungah kong bawlna thu na theitel uh hiam? ci-in a dong hi.

13. Note in kei, ‘Sia’ le ‘Topa’ nong ci uh a, tua thu a man hi; kei zong tua mah ka hi hi.

14. Tua ciangin keimah in note’ Topa le Sia hi napi-in na khe uh hong silsak ka hih leh, note zong khat le khat na kisilsak ding uh ahi hi.

15. Bang hang hiam cih leh, keimah in note’ tungah ka hih bangin note in na hihna dingun na etteh ding uh kong lak zo hi.

Hi in Topa' Lungdamna Laisiangtho ahi hi.