Catholic Nisim Lungdamna Laisiangtho, Mk.9:14-29 (Feb. 21.2022, Mon.)

14. Nungzui dangte’ omna ah amaute a tunkik uh ciangin, a kim uh ah mihon tampi na om uh a, lai siangtho siamte tawh thu kinial a om a mu uh hi. 15. Tua lai-a om mite khempeuh in Jesu a muh phetun lamdang sa uh a, a kiangah tai-in amah a hopih uh hi. 16. Jesu in amaute’ kiangah, “Amaute tawh bang thu kinial na hi uh hiam?” ci-in a dong hi. 17. Mihonpite’ lakah mi khat in, “Sia aw, ka tapa’ sungah dawi khat lutin pau thei loin koih ahih manin na kiangah kong paipih hi. 18. Tua dawi in amah a mat peuhpeuh ciangin leilak ah puksak a, a kam sung pan cilphuan bua a, a ha gawi-in, a gonggawcipsak hi. Na nungzuipite’ kiangah tua dawi a hawlkhiatna dingun ka nget hangin hawlkhia zo lo uh hi,” a ci hi. 19. Jesu in amaute’ kiangah, “Upna nei lo khang mite aw, note tawh bang tanvei hong omkhawm lai ding ka hi hiam? Bang tanvei hong thuak zo ding ka hi hiam? Tua naupang ka kiangah hong paipih un,” a ci hi. 20. Tua ciangin amaute in naupangno ama kiangah a paipih uh hi. Jesu a muh phetin dawi in tua naupang gonggawsak a, leilak ah pukin, a cilphuan bua-a a kipum khuk hi. 21. Jesu in, “Hih natna a kipat zawh bang tanvei sawt khin ahi hiam?” ci-in tua naupangno i a pa a dong hi. Amah in, “A neu tunga kipan ahi hi. 22. Naupang a kisiatna dingin tua dawi in meikhuk sung le tui sungah tamveipi a puksak hi. Ahi zongin, na khat peuhmah na hih zawh leh, kote hong hehpih inla, hong huh in,” ci-in a thum hi. 23. Jesu in ama kiangah, “Na hih zawh leh! - A um mi’ aadingin na khempeuh hi thei hi,” a ci hi. 24. Naupang ii a pa in thakhatin kiko a, “Ken ka um hi. Ka uplahna hong huh in!” ci-in a kiko hi. 25. Jesu in mi honpi hong tai a muh ciangin a muh ciangin, amah in kha nin taai-in a genin ah, “Hih naupang bengngong sakin pau theilo a a bawl nang kha nin, ama sung pan paikhia inla, lut kik nawn peuhmah kei in, ci-in thu kong pia hi!” a ci hi. 26. Tua dawi kiko-in naupang nakpi-in a gonggawsak khit ciangin paikhia a, naupang misi tawh kibangin, mi a tamzaw in, “Amah si ta hi,” a ci uh hi. 27. Ahi zongin Jesu in naupang’ khut lenin a phottoh leh amah a dingto hi. 28. Inn sungah Jesu a lut khit ciangin a nungzuipite in, “Kote in bang hangin tua dawi hawlkhia zo lo ka hi uh hiam?” ci-in a simdot uh hi. 29. Jesu in amaute’ kiangah, “Hih dawi gilo nam pen antanna le thungetna bek tawh kihawlkhia zo hi,” ci-in a dawng hi.