Catholic Nisim Lungdamna Laisiangtho, Mk 8: 27 - 33 (Feb 17.2022, Thur)

27. Jesu le a nungzuite, Caesarea(a) Philipi kima khuaneute ah a pai uh hi. Lam a pai laitakun amaute’ kiangah, “Mite in kei kua hi, hong ci uh ahi hiam?” ci-in a nungzuite a dong hi.

28. Amaute in, “Tuisawppa(b) John, a ci uh hi. Kimkhat in, Elijah,’ a ci uh hi. Ahi zongin midang kimkhat leuleu in kamsangte’ lakah khat hi, hong ci uh hi,” ci-in a dawng uh hi.

29. Tua ciangin Jesu in amaute’ kiangah, “Note in kei kua hi hong ci na hi uh hiam? ci-in a dot ciangin Peter in, “Nangmah in Christu* na hi hi,” ci-in a dawng hi.

30. Tua ciangin Jesu in ama thu kuamah a gen lohna dingun amaute khauhtakin thu a pia hi.

Jesu in a Sih ding le a Thawhkik ding Genkhol
(Mt 16:21-28; Lk 9:21-27)

31. Tua khit ciangin Jesu in, “Mihing’ Tapa in nakpi-in gimna thuak dinga, upate, siampi makaite, le lai siangtho siamte in amah nial ding uh a, amah in thahna thuakin ni thum khit ciangin a thokik ding hi,” ci-in amaute hilh a kipan hi.

32. Amah in hih thu teltakin gen a, tua ciangin Peter in Jesu tuamsap sim a, taai dingin a kipan hi.

33. Ahi zongin Jesu kihei a, a nungzuite enin, “Satan aw, ka nungah kihem in! Pasian’ thute ngaihsun loin mihing’ thute na ngaihsun hi,” ci-in Peter a taai hi.