Catholic Nisim Lungdamna Laisiangtho. Lungdambawl pawini. 25.12.2022(Sun)

John 1:1-18
1. A kipat cilin Thuo a om hi. Tua Thu in Pasian tawh om khawm a, Thu in Pasian ahi hi.

2. A kipat cilin Pasian tawh amah a om khawm hi.

3. Na khempeuh ama piansak hi a, amah lo-in a kipiangsak na khat beek om lo hi.

4. Ama sungah nuntakna om a, tua nuntakna in mi khempeuhte’ khuavak ahi hi.

5. Khuavak in khuamial lakah hong tang a, khuamial in khuavak mialsak zolo hi.

6. Pasian in mi khat hong sawl a, ama min John ahi hi.

7. Mi khempeuh in ama hangin thu a up theihna dingin khuavak thu teci a pang dinga hong pai ahi hi.

8. Amah khuavak hilo a, khuavak thu teci a pang ding bekin hong pai ahi hi.

9. Thu in khuavak taktak hi a, amah leitung ah hong pai-in mi khempeuh khuavak hong pia hi.

10. Leitung ah amah hong om khin a, ama hangin leitung a piang ahi hi. Ahi zongin leitung in ahih leh amah thei lo hi.

11. Amah in ama mite’ kiangah hong pai a, ama mite in amah sang lo uh hi.

12. Ahi zongin amah sang a, ama min a umte khempeuh tungah Pasian’ tate suah theihna ding vangliatna a pia hi.

13. Tua mite si-le-sa pana hong piang hi loin, si-le-sa’ deihna banga hong piang zong hi lo uh hi. Pasian’ pana hong piangkhia ahi uh hi.

14. Tua ciangin Thu in mihingin hong suak a, eite’ lakah hong om hi. Hehpihna le thuman thutak tawh amah kidim a, Pasian’ Tapa khat bek hihna tawh a neih minthanna eite in i mu khinzo hi.

15. (John in ama thu teci na pang a, “Ka nungah hong paipa in kei om ma-in om khin ahih manin, kei sangin a lianzaw hi, ci-a kong genpa in hih pa ahi hi,” ci-in a kiko hi.)

16. A kicing ama hehpihna panin eite khempeuh in thupha khat khit khat i ngah sawnsawn hi.

17. Bang hang hiam cih leh, Moses’ tungtawnin thukham hong kipia hi. Jesu Christu’ tungtawnin hehpihna le thuman thutak hong pai ahi hi.

18. Kuamah in Pasian mu ngei lo hi. Ahi zongin Pa’ ang sunga om Tapa bek in Pasian hong theikhiasak hi.

Hi in Topa' Lungdamna Laisiangtho ahi hi.