Catholic Nisim Lungdamna Laisiangtho. Lk 6:39 - 45 (Feb 27.2022, Sun)

39 Jesu in thugentehna khat zong amaute’ kiangah a gen hi: “Mittaw khat in mittaw khat lam hilh thei ahi hiam? Tua bang hi leh, a nih un dum sungah khiakhawm ding hilo ahi hiam?

40 A nungzuite in a siapa sangin lianzaw lo hi. Ahi zongin kicingtakin a sin khit uh ciangin a siapa mah a bang ding hi.

41 Na mit sunga singluang phawk kha loin, na sanggampa’ mit sunga ninneng tang bang hangin en na hi hiam?

42 Na mit sunga singluang om napi-in na sanggampa’ kiangah, ‘Sanggam aw, na mit a ninthem kong lakkhiatsak ding hi,’ ci na hi hiam? Nang mi hoih a kineihpa aw, na mit sunga a om singluang lakhia masa phot lecin, tua khit ciangin na sanggampa’ mit sunga ninneng tang lakkhiat ding na telmuh thei pan ding hi.

43 “Singkung hoih in gah hoih lo gahlo a, singkung hoih lo in gah hoih gahlo hi;

44 bang hang hiam cih leh singkung khempeuh a gahin kithei hi. Ling kung panin mite in thei gah lo ngei lo uh a, sialtal ling kung panin leenggah lo ngei lo uh hi.

45 Mi hoihpa in a lungsim sunga thu manphate hong pulakkhia a, mi hoihlopa in a lungsim sunga a hoihlote hong pulakkhia hi; bang hang hiam cih leh lungsim sungah a dimlet ciangin kamin kipaukhia hi.