Catholic Nisim Lungdamna Laisiangtho. Innkuan siangtho Pawini. 31.12.2023(Sun)

Luke 2:22-40
22. Moses’ thukham tawh kizui-in amaute a kisiansuah ding hun a cin ciangin amaute in Topa’ tungah naungek a ap dingin Jerusalem khuapi ah hong paipih uh a,

23. (Topa’ Thukham sungah, “Tacil peuhmah Topa’ tungah a siangtho ahi dingin a ki-ap ding hi,” ci-a a kigelh mah bangin) a ap uh hi,

24. tua ciangin amaute in Topa’ tungah, “Vakhu kop khat ahih kei leh, inn vakhuno nih,” ci-a Topa’ Thukham sunga kigelhna tawh kizui-in biakpiakna a pia uh hi.

25. Tu-in Jerusalem khuapi ah Simeon kici mi khat a om hi. Tua pa dikin biakna lamah hahkat a, Israel mite a kihehnepna ding lamenin a ngak hi. Ama tungah Kha Siangtho a om hi.

26. Topa’ ciamsa Messiah a muh matengin amah si lo ding hi, ci-in Kha Siangtho in a hilhsa ahi hi.

27. Kha Siangtho’ makaihna tawh biakinnpi ah amah hong pai hi; thukham ngeina bangin a bawl dingin a nu le a pate in naupang Jesu hong paipih uh a,

28. Simeon in Jesu a ang ah pomin tawi a, Pasian a phatin ah:

29. “Topa aw, na kamciamsa bangin na silapa tu-in lungnuam takin a paina dingin thu hong pia in.

30. Bang hang hiam cih leh, ka mitte in na hotkhiatna a mu zo uh hi.

31. Minam khempeuhte’ mai-ah tua hotkhiatna na bawlkhol zo hi.

32. Gentile mite’ aadinga na lah khuavak le na mi Israel mite’ minthanna ding ahi hi,” a ci hi.

33. Tua ciangin naupang’ nu le pate in amah tawh kisai-a thu kigente lamdang a sa uh hi.

34. Tua khit ciangin Simeon in amaute thupha pia a, a nu Maria’ kiangah, “Hih naungek in Israel mi tampite a kisiatna ding, a thawh kikna ding le a kilangneihna a kilatna ding lim a kiciangtansa ahi hi.

35. Tua ahih manin mi tampite’ lungsim tawng a kilatna dingin, nangma lungtang zong teipak in hong sunlet ding hi,” a ci hi.

36. Tua lai-ah Asher’ beh, Phanuel’ tanu Anna kici kamsang numei khat a om hi. Amah teek mahmah ta a, a khangno hun a kipanin a pasal tawh kum sagih sung bek om khawm uh a,

37. amah kum sawm giat le kum li a phak dong meigongin a om hi. Amah in biakinnpi nusia ngei lo a, a sun le a zanin antanna le thungetna tawh Pasian a bia hi.

38. Tua laitakin amah hong pai a, Pasian phatin, Jerusalem a kihotkhiatna a zong mi khempeuhte’ tungah hih naungek’ thu a gen hi.

39. Topa’ thukham in a kalh bangin amaute in na khempeuh a bawl khit uh ciangin, Galilee gam amau khua Nazareth ah a ciah uh hi.

40. Naupang hong khangto a, a thahatna hong khang hi, amah pilna tawh kidim a, Pasian’ hehpihna thupha zong ama tungah a om hi.

Hi in Topa' Lungdamna Laisiangtho ahi hi.

Add new comment

1 + 1 =