Catholic Nisim Lungdamna Laisiangtho. Hun Nautang Nipi Kaal (33) Na. 22.11.2023(Wed)

Luke 19:11-28
11. Amaute in hih thu a ngaih laitakun, Jesu in thugentehna khat a gen lai hi. Bang hang hiam cih leh, amah Jerusalem khuapi ah tung dektak ta ahih manin amaute in Pasian’ gam thakhatthu-in hong kilang pah dingin a ngaihsun uh hi.

12. Tua ahih manin amah in, “Mi thupi khat in kumpi za a ngah khit ciangin a ciahkik dingin khual gamlapi ah a zinkhia dingin a kithawi hi.

13. Amah in a nasemte sawm samin, dangkasano sawm pia a, ‘Kong ciahkik mateng hih sumte tawh summet na bawl un,’ a ci hi.

14. Ahi zongin gam mite in amah mudah uh a, palai khat nungdelhsakin, ‘Kote hong uk dingin hih mipa ka deih kei uh hi,’ci-in a gensak uh hi.

15. Tua pa kumpi a suah khit ciangin hong ciahkik a, a sum a apna a nasemte in bangzah a metsak uh hiam, cih a theihna dingin amaute a samsak hi.

16. A khatna pa hong pai a, ‘Topa aw, nong piak dangkasan khat tawh dangkasan sawm a met ka ngah zo hi,’ a ci hi.

17. Amah in tua nasempa’ kiangah, ‘A hoih ka nasempa aw, na hoih na sem hi! Thu neu mahmah khat tung ah muanhuai na hih manin khuapi lian sawm na uk ding hi,’ a ci hi.

18. Tua ciangin a nihna nasempa hong pai a, ‘Topa aw, nong piak dangkasan khat tawh dangkasan nga a met ka ngah zo hi,’ a ci hi.

19. A topa in ama kiangah, ‘Nang in khuapi nga na uk ding hi,’ a ci hi.

20. Tua ciangin a nasem dang khat hong pai-a, ‘Topa aw, hih lai-ah na dangkasan a om hi; puan tawh tunin mun khatah ka koihcip hi.

21. Bang hang hiam cih leh nang mi genhak na hi a, na koih lohpi la-in, na vawh lohpi at na hih manin nang kong kihta hi,’ a ci hi.

22. A topa in tua pa’ kiangah, ‘Nang a gilo nasempa aw, nangma kam sung pana na thugente tawh kizui-in na tungah thu kong khen ding hi! Keimah in mi genhak hi-in, ka koih lohna ah lakhia-in, ka vawh lohpi at ka hih lam thei takpi na hi hiam?

23. Tua hi leh bang hangin summet khakte’ kiangah ka sum ap lo na hi hiam? Tua bangin hih lecin kong ciahkik ciangin ka sum a met tawh ka ngahkik thei ding hi,’ a ci hi.

24. Tua ciangin amah in a gei-a dingte’ kiangah, ‘Tuapa’ tung pan dangkasan khat lakhia unla, dangkasan sawm a neipa pia un,’ a ci hi.

25. (Tua ciangin amaute in ama kiangah, ‘Topa aw, hih pa in dangkasan sawm a nei zo hi,’ a ci uh hi.)

26. ‘Ken kong genin ah, a neite khempeuh kipiak beh dinga, ahi zongin a nei lote’ tung pan ahih leh a neihsun nangawn kilakkhiatsak ding hi.

27. Ahi zongin amaute’ tungah kumpi dinga hong deih lo ka galte hih lai-ah hong paipih unla, keima mai-ah that un,’ ci-in thu a pia hi,” a ci hi.

28. Jesu in hih thute a gen khit ciangin amah mapai-in Jerusalem khuapi ah a paito hi.

Hi in Topa' Lungdamna Laisiangtho ahi hi.