Catholic Nisim Lungdamna Laisiangtho. Hun Nautang Nipi Kaal (12) Na. 23.6.2022(Thur)

Mt 7:21-29
21. “Kei’ kiangah, ‘Topa, Topa aw,’ hong ci khempeuhte vantung gamah lut kim lo ding uh hi. Vantunga om ka Pa’ deihna bangin a gamtate bek a lut thei ding uh hi.

22. Tua ni ciangin mi tampi in ka kiangah, ‘Topa, Topa aw, kote in nangma min tawh kam sangin, nangma min tawh dawi gilote ka hawlkhia uh a, nangma min tawh na lamdang tampi bawl hi lo ka hi uh hiam?’ hong ci ding uh hi.

23. Tua ciangin keimah in, ‘Note kong thei ngei kei hi. Gitlohna a bawlte aw, na vekpi-un kei kiang panin paikhia un!’ ka ci ding hi.

24. “Hih ka thugente za a, a zuite khempeuh in suangpi tunga inn a lam mipilpa tawh kibang ding hi.

25. Guah zu-in tui khang a, huihpi nungin, tua inn a nawk hangin, suangpi tungah kilam ahih manin puk lo hi.

26. Hih ka thu gente za napi-in a zui lo peuhmah sehnel tunga inn lam mihaipa tawh kibang ding hi.

27. Guahzu-in, tui khanga, huihpi nungin tua inn a nawk ciangin puk a, tua pukna in pukna lian ahi hi,” a ci hi.

28. Jesu in hih thute a gen khit ciangin ama thugente a za mi honpite in lamdang a sa uh hi.

29. Bang hang hiam cih leh, amah in lai siangtho siamte bangin hilh lo a, ukna thuneipa khat bangin thu a hilh hi.

Hi in Topa' Lungdamna Laisiangtho ahi hi.

Add new comment

2 + 5 =