Catholic Nisim Lungdamna Laisiangtho. Hun Nautaang Nipi Kaal (9) na. 5.6.2024 (Wed)

Mark 12:18-27
18. Tua khit ciangin misite’ thawhkikna om lo hi, a ci Sadducee-te Jesu kiangah va pai uh a,

19. “Topa aw, ta nei man loin a zi a sihsan pasal khatpeuh a om leh a nau in a zi luah henla, a u’ khang a man’ lohna dingin kizom ta hen,’ ci-in Moses in kote’ aadingin lai na gelh hi.

20. Unau pasal sagih a om hi. A u pen in zi nei a, ta nei loin a si hi.

21. A nihna pa in a zi luah a, ta nei loin a si hi.

22. A thumna pa zong tua mah bang ahi hi. Tua bangin unau pasal sagihte khat beek in ta a nei man kei uh hi. A tawpkhakna ah tua numei zong a si hi.

23. Tua ahih leh tua numei in unau pasal sagih teng teenpih kim ahih manin thawhkik ni ciangin amah kua pen’ zi hi ding ahi hiam?” ci-in a dong uh hi.

24. Jesu in amaute’ kiangah, “Note in Lai Siangtho ahi zongin, Pasian’ vangliatna ahi zongin theilo na hih manun um khial hilo na hi uh hiam?

25. Bang hang hiam cih leh, misite a thawhkik ciangin mopina le mokhaknate om lo ding hi. Amaute in vantung mite tawh kibangin a om ding uh hi.

26. Misite thawhkikna tawh kisai-in Pasian in, Moses’ kiangah, ‘Keimah in Abraham’ Pasian, Isaac’ Pasian le Jacob’ Pasian ka hi hi,’ ci-a sawlbawk laka a genna thu Moses’ laibu sungah sim ngeilo na hi uh hiam?

27. Amah in a site’ Pasian hi loin, a nungtate’ Pasian ahi hi. Note nakpitakin na khial uh hi!” a ci hi.

Hi in Topa' Lungdamna Laisiangtho ahi hi.