Catholic Nisim Lungdamna Laisiangtho. Hun Nautaang Nipi Kaal (9) na. 4.6.2024 (Tue)

Mark 12:13-17
13. Tua khit ciangin amaute in ama’ kam tawh a mat theihna dingun Pharisee-te le Herod’ pawlte Jesu’ kiang ah a paisak uh hi.

14. Amaute hong pai uh a, Jesu’ kiangah, “Sia aw, nang thuman thutak a genpa na hi hi. Kuamah maivil nei loin, kuamah deidan na nei kei a, Pasian’ thuman tawh kizui-in na hilh cih ka thei uh hi. Tua hi a, Caesar’ tung ah siah piak tuak hiam, piak tuak lo hiam?

15. Ka pia ding uh hiam, ka pia kei ding uh hiam?” ci-in a dong uh hi. Ahi zongin Jesu in amaute’ lungsim kawi a theih ciangin, “Bang hangin kei hong ze-et na hi uh hiam? Denarius peek khat hong la unla hong veelsak un,” a ci hi.

16. Amaute in tua sum tang hong paipih uh a, Jesu in amaute’ kiangah, “Hih in kua lim hi a, kua min ahi hiam? ci-a a dot ciangin, “Caesar’ lim le min hi,” ci-in a dawng uh hi.

17. Jesu in amaute’ kiangah, “Caesar tawh kisai nate, Caesar’ tungah pia unla, Pasian tawh kisai nate, Pasian’ tungah pia un,” a ci hi. Amaute in amah lamdang a sa mahmah uh hi.

Hi in Topa' Lungdamna Laisiangtho ahi hi.