Catholic Nisim Lungdamna Laisiangtho. Hun Nautaang Nipi Kaal (8) na. 1.6.2024 (Sat)

Mark 11:27-33
27. Amaute Jerusalem khua ah hong tung kik uh a, biakinnpi tual ah Jesu a vak kawikawi laitakin, siampi makaite, lai siangtho siamte le upate ama kiangah hong pai uh a,

28. “Hihte bang thuneihna tawh bawl na hi hiam? Tuate hih theihna ding thuneihna kua in hong pia ahi hiam?” ci-in a dong uh hi.

29. Jesu in amaute’ kiangah, “Kei zong khat kong dong ding hi. Hong dawng un; tua ciangin ken zong bang thuneihna tawh hihte hih ka hi hiam, cih kong gen ding hi.

30. John’ tuisawpna thu koi pana hong pai ahi hiam? Vantung pan ahi hiam, mihing tung pan ahi hiam? Hong dawng un!” a ci hi.

31. Amaute khat le khat kinial uh a, “ ‘Vantung pan hong pai hi,’ ci le hang, ‘Tua ahih leh note in ama thu bang hangin um lo na hi uh hiam?’ hong ci zel ding hi.

32. Ahi zongin mihing’ tung pan hong pai hi,’ ci le hang, mipite i kihta hi, bang hang hiam cih leh, mi khempeuh in John pen kamsang taktak khatin a sang uh hi,” a ci uh hi.

33. Tua ahih manin amaute in, “Ka thei kei uh hi,” ci-in a dawng uh hi. Jesu in amaute’ kiang ah, “Ken zong hih nate kua thuneihna tawh ka bawl cih kong gen kei ding hi,” a ci hi.

Hi in Topa' Lungdamna Laisiangtho ahi hi.