Catholic Nisim Lungdamna Laisiangtho. Hun Nautaang Nipi Kaal (6) Na. 18.2.2023(Sat)

Mark 9:2-13
2. Ni guk khit ciangin Jesu in Peter, James le John-te samin mual sang tungah amau teng bek a kahtohpih hi. Tua lai-ah amaute’ mai-ah a mitmuh-un ama meel a kikhel hi.

3. A puan silhte zong pak a, hih leitunga puansawp mi kuamah in a paksak zawh loh ding zah dongin a te-daldal hi.

4. Tua ciangin amaute’ mai-ah Elijah le Moses kilanga, Jesu tawh a kiho uh hi.

5. Tua khit ciangin Peter in Jesu’ kiangah, “Topa aw, hih lai-a om nuam mahmah hi. Nang’ aading buk khat, Moses’(a) aading buk khat, Elijah’(b) aading buk khat, buk thum lam ni,” a ci hi.

6. Amaute lau mahmah uh ahih manin, Peter in a gen ding thei lo hi.

7. Tua khit ciangin meii in amaute tuamcip a, tua meii lak panin aw khat hong gingin, “Hih in ka it ka Tapa ahi hi. Ama thu na ngai un,” a ci hi.

8. Tua khit phetin a kim a pam a et uh leh, Jesu longal kuamah dang mu nawn lo uh hi.

9. Mual tung pan a kumsuk laitakun, Jesu in amaute’ kiangah, “Mihing’ Tapa in sihna pan a thawhkik matengin na muhte uh kuama kiangah gen kei un,” ci-in a nungzuite thu a pia hi.

10. Tua ahih manin amaute in a lungsim sung uh ah hih thu koih gige uh a, sihna pan thawhkikna, a cih in bang a cihnopna ahi hiam, ci-in khat le khat a kikum uh hi.

11. Tua khit ciangin amaute in, “Elijah hong pai masa ding hi,” ci-in lai siangtho siamte in bang hangin gen uh ahi hiam?” ci-in amah a dong uh hi.

12. Jesu in amaute’ kiangah, “Elijah hong pai masa takpi a, na khempeuh a bawl pha kik hi. Mihing’ Tapa in zong nakpi-in gimna thuak dinga, nialna a thuak ding hi, ci-in Lai Siangtho sungah kigelh khin hilo ahi hiam?

13. Ahi zongin ken kong genin ah, Elijah hong pai khin zo a, ama thu Lai Siangtho sungah a gelhsa bangin amau ut bangin ama tungah a bawl khin zo uh hi,” ci-in a dawng hi.

Hi in Topa' Lungdamna Laisiangtho ahi hi.