Catholic Nisim Lungdamna Laisiangtho. Hun Nautaang Nipi Kaal (5) Na. 10.2.2024(Sat)

Mark 8:1-10
1. Tua hun sung mah khatvei mihon tampi hong kikhawmkik uh hi. Amaute in nek ding bangmah nei lo uh ahih manin Jesu in a nungzuipite sam a,

2. “Hih mite hehpihhuai ka sa hi. Bang hang hiam cih leh, kei’ kiangah hong om zawh uh ni thum pha khin ta a, a nek ding uh bangmah nei lo uh hi.

3. Gilkialpi-in inn ah ciahsak leng pawlkhatte gamlapi pana hong pai uh ahih manin lamkal ah gilkialin a gim ding uh hi,” a ci hi.

4. A nungzuipite in, “Hih gamlak ah hih mite’ an kham ding bang lak pan kingah zo ding ahi hiam?” ci-in a dawng uh hi.

5. Jesu in, “Khomun pum bangzah na nei uh hiam? ci-in a dot ciangin amaute in, “Pum sagih a om hi,” a ci uh hi.

6. Tua khit ciangin Jesu in, “Mihonpi leilak ah tusak un,” ci-in a sawl hi. Tua ciangin khomun pum sagihte la a, lungdam a koh khit ciangin balneenin mipite a hawmkhiatna dingin a nungzuipite a pia hi, tua ciangin amaute in mipite’ tungah a hawmkhia uh hi.

7. Amaute in ngasa tawmno zong a nei uh hi; Jesu in tuate thupha a piak khit ciangin, a hawmkhia dingin a nungzuipite thu a pia hi.

8. Amaute in ne-in, a kham khit uh ciangin a khamval uh a neng a themte tawm uh a, seng sagih dim a ngah uh hi.

9. Tu-in mipite tul li bang a pha uh hi. Tua ciangin Jesu in amaute a sawlkhia hi.

10. Tua khit ciangin Jesu a nungzuipite tawh gunkuang tungah tuang pah uh a, Dalmanutha gam lam zuanin a pai uh hi.

Hi in Topa' Lungdamna Laisiangtho ahi hi.