Catholic Nisim Lungdamna Laisiangtho. Hun Nautaang Nipi Kaal (29) Ni. 16.10.2022(Sun)

Luke 18:1-8
1. Tua khit ciangin a nungzuite in lungkia loin thu a nget tawntungna dingun Jesu in thugentehna khat a gen hi.

2. Amah in, “Khuapi khat ah Pasian a kihta lo, mite a awlmawh lo thukhen mangpa khat a om hi.

3. Tua khuapi sungah meigong nupi khat a om hi. Amah in thukhen mangpa’ kiangah pai ngitnget a, ‘Ka langpa’ tungah mantakin thu hong khensak in,’ ci-in a ngen hi.

4. Ahi zongin thukhen mangpa in a thu khensak loin sawtveipi a diah hi. A tawpkhakna ah amah in, ‘Keimah in Pasian kihta loin mite ka awlmawh loh hangin,

5. hih meigongnu in kei hong buaisak den ahih manin ama aading thu ka khen ding hi. Tua hi kei leh, amah hong pai ngitngetin kei hong gimsak ding hi,’ ci-in a ngaihsun hi,” a ci hi.

6. Tua ciangin Topa in, “Aman lo tua thukhen mangpa’ thugente ngaihsun un.

7. Pasian’ teelsate in sun le zanin ama kiangah kiko-in thu a nget uh leh, amaute’ thu khensak ding hilo ahi hiam? Amaute a huh dingin hong zekai nawn ding ahi hiam?

8. Ken kong genin ah amah in amaute’ tungah thu man thu tang manlang takin a pia ding hi. Ahi zongin Mihing’ Tapa leitungah hong kum ciangin upna a mu taktak ding hiam?” a ci hi.

Hi in Topa' Lungdamna Laisiangtho ahi hi.