Catholic Nisim Lungdamna Laisiangtho. Hun Nautaang Nipi Kaal (24) Na. 17.9.2022(Sat)

Lk 8:4-15
4. Khua khat khit khua khat panin Jesu’ kiangah mi tampi hong pai uh a, mihonpi hong kikaihkhop uh ciangin, amah in thugentehna khat tawh thu a gen hi:

5. “Khaici vawhpa in khaici vawh dingin a kuankhia hi. Khaici a vawh laitakin kimkhatte lam dungah tu a, khe tawh kisikgawpin, van a vasate in tawmin a ne mang uh hi.

6. Pawlkhatte suang lakah tu a, a po ciangin leikawt zo lo ahih manin a vulgawp hi.

7. Adang pawlkhatte ling lakah tu a, lingkung tawh khang khawmin lingkung in a depgawp hi.

8. Pawlkhatte lei hoihna-ah tu hi, tuate hong po-in a zah za khat a gah hi,” a ci hi. Hih thu a gen khit ciangin, “Zakna ding bil a nei peuhmah in za ta hen!” ci-in a kiko hi.

9. Tua khit ciangin a nungzuipite in hih thugentehna a khiatna amah a dong uh hi.

10. Jesu in, “Pasian’ gam’ thuthukte na theihna dingun note thu hong kipia hi. Midangte ahih leh, mu napi-in tel lo ding uh hi. Zaza napi-in a khiatna a theih lohna dingun thugentehna zangin amaute thu a kihilh hi,” a ci hi.

11. “Tu-in hih thugentehna a khiatna in hih bang ahi hi: Khaici in Pasian’ thu ahi hi.

12. Lampi dungah a tute in, Pasian’ thu a zak khit uh ciangin um uh a, hotkhiatna a ngah lohna dingin, dawi mangpa hong pai-in, amau lungsim panin Pasian’ thu a lakkhiatte ahi uh hi.

13. Suang lak a a tute in, Pasian’ thu a zak uh ciangin lungdamin a sang pahte ahi uh hi. Ahi zongin amaute in zung kip nei lo uh a, ze-etna a thuak uh ciangin a tawp kikte ahi uh hi.

14. Ling laka a tute in, Pasian’ thu a zak khit uh ciangin amau deihna bang zui-in, a nuntakna ding uh a lunghimawhte, hauhnate le nopsaknate in depgawp a, a picing lote ahi uh hi.

15. Lei hoihna ah a tute in, Pasian’ thu a zak uh ciangin thuman le lungsim hoih tawh kem den uh a, a tawp dong lungkip takin thuakin gah a gahte ahi uh hi.

Hi in Topa' lungdamna Laisiangtho ahi hi.