Catholic Nisim Lungdamna Laisiangtho. Hun Nautaang Nipi Kaal (22) na. 1.9.2024 (Sun)

Mark 7:1-8.14-15.21-23
1. Tu-in Pharisee-te le lai siangtho siamte pawlkhat Jerusalem panin Jesu’ kimkoh ah hong kikaikhawm uh a,

2. a nungzuite kimkhat in khut sil loin an a nek uh a mu uh hi.

3. (bang hang hiam cih leh Pharisee-te le Jew mite khempeuh in pupate’ ngeinate a kipletna-un a ngeina bangin khut sil masa loin an ne lo uh hi.

4. Amaute sumbuk panin hong ciah uh ciangin zong kisil masa loin an ne lo uh hi. Tua ciangin haite, tuivot-beelte le niangbeelte sawpsiangna-a kipan tanglai ngeina adang tampite zong a tang uh hi.)

5. Tua ahih manin Pharisee-te le lai siangtho siamte in, “Bang hangin na nungzuite in pupate’ ngeina zui loin, khut nin tawh an ne ahi uh hiam?” ci-in a dong uh hi.

6. Jesu in amaute’ kiangah, “Isaiah in mi hoih a kineih khem note’ thu lai siangtho ah teltakin hih bangin na genkhol zo hi, ‘Hih mite in a muk uh tawh kei hong pahtawi uh a, ahi zongin a lungtang uh kei tawh kigamla hi.

7. A mawkna-in kei hong bia uh a, mihing’ bawltawm zuih ding thute upna zungpite bangin a hilh uh hi,’ ci-in kigelh hi.

8. Note in Pasian’ thupiakte nusia-in, mihingte’ bawltawm ngeinate na lencip uh hi,” a ci hi.

14. Tua khit ciangin Jesu in mihonpite ama kiangah samkik a, amaute’ kiangah, “Note khempeuh in ka thugen ngai unla, tel un.

15. A pualam pan mihing’ sungah lutin mi a ninsak thei bangmah omlo a, ahi zongin mihing sung pan a pusuakkhiate in mi a ninsak hi.

21. Bang hang hiam cih leh, a sunglam mihing’ lungtang panin a hoih lo ngaihsutna, nungak tangval mawhna, guktakna, mi thahna,

22. numei le pasal mawhna, huaihamna, muhdahna, zuautatna, thaangtatna, enna, gensiatna, kiphatsakna le haitatnate a pusuakkhia hi.

23. Hih gitlohnate khempeuh a sunglam pana hong pusuakkhia hi a, mihing a ninsak uh hi,” a ci hi.

Hi in Topa' Lungdamna Laisiangtho ahi hi.