Catholic Nisim Lungdamna Laisiangtho. Hun Nautaang Nipi Kaal (19) Na. 11.8.2022(Thur)

Mt 18:21-9:1
21. Tua khit ciangin Jesu’ kiangah Peter va pai a, “Topa aw, ka sanggam khat ka tungah hong mawh leh a mawhna bangzah vei maisak ding ka hi hiam? Sagih vei dongin maisak ding ka hi hiam?” ci-in a dong hi.

22. Jesu in, “Sagih vei ciang bek ka ci kei a, sawm sagih mun sagih(d) vei dongin maisak in, kong ci hi” a ci hi.

Mawh a Maisak lo Nasempa tawh Thugentehna

23. “Tua ahih manin vantung gam in a nasemte tawh a sum ciamtehna lai a sittel nuam kumpipa tawh kibang hi.

24. Amah in sum ciamtehna lai sittel dingin a kipat ciangin talent(e) tulsawm a ba a nasempa a mai-ah hong kipaipih hi.

25. Tua nasempa in a sumbat loh zolo ahih manin amah a kipan a zi a tate le a neihsa khempeuh zuakin a leiba a lohna dingin a topa in thu a pia hi.

26. Tua ahih manin tua nasempa a topa’ mai ah khukdin a, ‘Hong ngak lai in; a vekpi-in kong loh ding hi,’ ci-in a thum hi.

27. Tua ciangin a topa in hehpihhuaisa a, a leiba khempeuh maisakin a khah hi.

28. Ahi zongin tua nasempa a paikhiat ciangin, ama sum dangka denarii(f) za khat a ba, a naseppihte khat mu a, a gawl mekin, ‘Nong leibat hong loh meng in,’ a ci hi.

29. Tua ciangin naseppihpa zong a mai-ah boksukin, ‘Hong ngak lai in; kong loh ding hi,’ ci-in a thum hi.

30. Ahi zongin ama thumna sang nuam lo a, a leiba teng a loh khit matengin thong sungah a khum hi.

31. Nasem dangte in hih thupiang a theih uh ciangin dahpih mahmah uh a, pai-in a thupiang khempeuh a topa’ kiangah a ko uh hi.

32. Tua ciangin a topa in tua nasempa sam a, ‘A gilo nasempa aw, nangmah in kei’ tungah nong thum manin na leiba khempeuh kong maisak hi.

33. Nang kong hehpih mah bangin nangmah in zong na naseppihpa na hehpih ding kilawm hilo ahi hiam?’ a ci hi.

34. A topa heh mahmah a, tua nasempa a leiba khempeuh a loh khit matengin thong a kiat theihna dingin thong ukte’ khut sungah a pia hi.

35. Tua ahih manin note in zong na sanggamte uh’ mawhna na lungsim taktak uh tawh na maisak kei uh leh, vantung a om ka Pa in tua mah bangin note khat ciat tungah hong bawl ding hi,” a ci hi.

1. Jesu in hih bangin thu a gen khit ciangin Galilee gam nusiain, Judea gam Jordan gun galkhat ah a pai hi.

Hi in Topa' lungdamna Laisiangtho ahi hi.