Catholic Nisim Lungdamna Laisiangtho. Hun Nautaang Nipi Kaal (18) na. 7.8.2024 (Wed)

Matthew 15:21-28

21. Jesu in tua mun nusia-in, Tyre le Sidon gam sung tengah a pai hi.

22. Tua khit phetin tua mun a teeng Canaan numei khat in a kiangah hong pai a, “David’ Tapa, Topa aw, kei hong hehpih in. Ka tanu in dawi gilo’ bawlsiatna nasiatakin a thuak hi,” ci-in kiko-in a thum hi.

23. Ahi zongin amah in kam khat zong dawng lo hi. Tua ciangin nungzuite ama kiangah hong pai uh a, “Hih numei in i nung hong zui-in kikoko hi, amah a ciahna dingin sawl in,” ci-in a kun uh hi.

24. Amah in zong, “Kei pen Israel innkuan sung panin a mangthangsa tuute’ kiang bekah hong kisawl ahi hi,” ci-in a dawng hi.

25. Ahi zongin tua numei hong pai-in a mai-ah khukdin a, “Topa aw, kei hong huh in,” a ci hi.

26. Amah in, “Tate’ an nek ding laksakin, uite piak ding kilawm lo hi,”ci-in a dawng hi.

27. Numei in zong, “Hi mah hi, Topa aw, uite nangawn in a topa’ sabuai panin an neng kiate ne thei hi,” a ci hi.

28. Tua ciangin Jesu in tua numei’ kiangah, “Numei aw, na upna lian mahmah hi. Na deihna bangin na tungah hong piang ta hen,” a ci hi. Tua hun laitak mahin a tanu a dampah hi.

Hi in Topa' Lungdamna Laisiangtho ahi hi.