Catholic Nisim Lungdamna Laisiangtho. Hun Nautaang Nipi Kaal (18) na. 4.8.2024 (Sun)

John 6:24-35
24. Mihonpite in Jesu le a nungzuipite tua lai-ah a om loh lam a theih uh ciangin gunkuang tungah tuang leuleu a, Jesu zong dingin Capernaum khua ah a pai uh hi.

25. Tuilipi galkhat ah Jesu a muh uh ciangin amaute in, “Rabbi aw, cik-a hih lai-ah tung na hi hiam?” ci-in a dong uh hi.

26. Jesu in amaute’ kiangah, “Ken a man takpi kong genin ah, note in na lamdang na muh manun kei hong zong na hi kei uh hi; ahi zongin khomun ne-in na kham manun kei hong zong na hi uh hi.

27. A sia thei an aadingin hahkat kei un; ahi zongin nuntak tawntungna na ngahna dingun Mihing’ Tapa in note hong piak ding an na ngahna dingun na hahkat un. Bang hang hiam cih leh, Pa Pasian in ama tungah siil tawh a ciamteh hi,” a ci hi.

28. Tua ciangin amaute in, “Pa Pasian’ na ka sep theihna dingun bangci bangin ka gamta ding uh hiam?” ci-in a dong uh hi.

29. Jesu in amaute’ kiangah, “Pasian’ hong sawlpa upna in Pasian’ na, sepna ahi hi,” ci-in a dawng hi.

30. Tua ciangin kote in mu-in kong up theihna dingun na lamdang bang hong lak ding na hi hiam? Nangmah in bang hih ding na hi hiam?

31. Amah in vantung panin amaute’ nek ding khomun a pia hi, ci-in Lai Siangtho sungah a kigelh mah bangin, ka pu ka pate un sehnel gamlak ah manna* a ne uh hi,” a ci uh hi.

32. Tua ahih manin Jesu in amaute’ kiangah, “Ken a man takpi kong genin ah, vantung pan khomun hong pia pen Moses hilo hi; vantung pana khomun taktak hong pia pen ka Pa ahi hi.

33. Bang hang hiam cih leh, Pasian’ khomun in vantung pan hong kumsuk a, leitung mite nuntakna a pia khomun ahi hi,” a ci hi.

34 Amaute in, “Sia aw, tua bang ahih leh tua khomun kote hong pia tawntung in,” a ci uh hi.

35. Jesu in amaute’ kiangah, “Keimah in nuntakna khomun ka hi hi. Kei’ kiangah hong pai mi peuhmah cikmah hunin gilkial ngei nawn lo ding a, kei hong um peuhmah in dangtak ngei nawn lo ding hi.

Hi in Topa' Lungdamna Laisiangtho ahi hi.