Catholic Nisim Lungdamna Laisiangtho. Divine Mercy Sunday 7.4.2024 (Thur)

John 20:19-31
19. Tua nipikal, ni masa ni, a nitak ciangin nungzuipite in Jew mite kihta-in kong kikalhkhum uh a, a kikhop laitakun Jesu pai-in, amaute’ lakah hong dinga, “Note tawh nopna om ta hen!” a ci hi.

20. Tua bang a cih khit ciangin a khut le a pang a lak hi. Tua ciangin a nungzuipite in Topa a muh uh ciangin a lungdam uh hi.

21. Jesu in khatvei, “Note tawh nopna om ta hen! Pa in kei hong sawl bangin keimah in note kong sawl hi,” a cikik hi.

22. Tua ciangin amaute’ tungah a hu mut a, “Kha Siangtho na sang ta un.

23. Note in mi khatpeuh’ mawhnate na maisak uh leh tua mawhnate kimaisak ding hi. Mi khatpeuh’ mawhnate note in na maisak kei uh leh tua mawhnate a om lai ahi hi,” a ci hi.

24. Ahi zongin Jesu hong pai laitakin sawm le nihte’ lakah khat ahi (Didymus kici) Thomas om lo hi.

25. Tua ahih manin nungzuipi dangte in ama kiangah, “Kote in Topa ka mu khin uh hi,” a cih uh ciangin amah in amaute’ kiangah, “A khut-a siktukkilh ma mu a, siktukkilh khetna pawnte sungah ka khutmete koihin, ama pang zong ka khut tawh ka lawn kei leh, ka um kei ding hi,” a ci hi.

26. Nipikal khat khit ciangin, a nungzuipite inn sungah khatvei kikhawmkik uh a, Thomas zong amaute tawh a omkhawm hi. Kongkhakte kalh uh hi napi-in Jesu hong pai-in amaute’ laizang ah dinga, “Note tawh nopna om ta hen!” a ci hi.

27. Tua ciangin Jesu in Thomas’ kiangah, “Na khutme hih lai-ah khum inla, ka khutte hong en in. Na khut zan inla, ka pang hong lawng in, umlah nawn kei inla, um taktak in,” a ci hi.

28. Thomas in, “Ka Topa le ka Pasian!” a ci hi.

29. Jesu in ama kiangah, “Nangmah in kei nong muh manin hong um na hi hiam? Mu lo napi-in a um mite in thupha a ngah ding uh hi,” a ci hi.

30. Tu-in Hih laibu’ sungah a kigelh lo lim dang tampi zong Jesu in a nungzuipite’ mai-ah a lak hi.

31. Ahi zongin Jesu in Christu hi a, Pasian Tapa ahi hi, cih na up theihna ding uh le tua upna hangin ama minin nuntakna na ngah theihna dingun hih thute a kigelh ahi hi.

Hi in Topa' Lungdamna Laisiangtho ahi hi.