Zu leh sa in ngeina hiam?

Cultural Knowledge tawh kisai in, "Zu leh sa in ngeina hiam? " cih bulphuh in Sia Bernard Lian tawh holim khawm dingin kong cial hi. Zomi ih pu ih pa te'n khang lui hun lai-in, Zo lapi te sa in, zu leh sa cih kammal tawh nuam nasa pha mahmah uh hi. Pasal a ki sa pha mahmah te'n a ton', a aih nop uh ciang in, lo za pi tak kho in, an a hauh tak ciang un, nu pa tha hual na ci-in, Tong tong in na za ai uh hi. Tua bang a ton' ciang in a hau a nei miten' ni 7 sung tawntung bang zu leh sa tawh ki diah zih ziah in om zo zen uh hi.

Pawl khat te leu leu in taang seu (100) bang a neih nak leh taang' za aai-in, nuam sa mahmah uh hi. Pawl khat te leu leu in, Sa tampi tak man in, Sapi a mat tak ciang un, Sa aai –in , ni thum sung bang zu tawh sa tawh ki diah in a nawng zih ziah zen uh hi.
Tua bang daan, ton' leh aih cih te in khua sung ah kum 5 bang teh khat bang bek tong' in, Sa aai uh hi. Ni sim aa, zu tawh sa tawh a niaang den hi zen zen peuh mah lo hi. Bang hang in hih bang daan in om hiam? cih leh lai thei ki om nai lo, khua mu, mipil , tho thei ki tam nai lo ban ah, Pasian thu cih bang ki za ngei nai vet lo a hih man in, dawi biak na a hi, Ton' na leh Sa aaih cih na te tawh nun in nuam sa in, a lung kim pah mahmah uh hi. Lai Siangtho sung ah (Zm 10:14-15) " A hilh om kei leh bang ci zak thei ding uh hiam? a ki sawl kei leh bang ci hilh theih dinguh hiam?" a cih mah bang za ngei vet lo ki gen ngei vet lo a hih man in, a mau a khial kici thei lo ding hi.

Zomi pu leh pa te in, zu dawn, sa ne in, a khawl khop ciang un, Ngeina zo la pi te sa in, ki-it , ki ngaihna la ki phuah in, ki paih uh hi. Zu a kham uh hang in, ki tawng, ki sel ki laaii, cih te om khol lo uh hi. ci tak mahmah uh a, Zuau thu tawh nuntak sawm het lo uh hi.
Tun ei Zo suan Christian khang thak te hun ciang in, ki khet mi sak in, ki model sak in, ki pil ki siam sak in, a tong', a aai lo buang, ni sim in, zu leh sa tawh ki diah tamawk ih hih man in, ih Pasian thu zui na ih ki sak theih pih mahmah hang in ii gam tat na, ii lu heek na te, ni dang lai dawi bia te sang in ki huai zaw ih hih man, zuum huai leh dah huai ka sapha mah mah hi.

Tu lai ei Zo suan khang thak ten' zu leh sa ii nek ciang in, ki tawng in, ki laaii-in, ki sia in, ki langh bawl in, gal leh sa bang aa om ih hih man , Zo zu ten' hong thuak zo nawn lo in, zu hang thawl te aang tawi –in, lawm nu, lawmpa bang nei in, zu gim nam lua ki sa in, hai zo phial mawk zen hi hang.

Tua ban ah, Pasian biak inn te ah pawi bawl hun ciang in, khut tawi sim, guta in, ki gen sia in, om ih hih man, Christian pawi bawl an kuang itna tawh um khawm hong hi nawn lo in, dawi mang pa sila sem in, nu pipi, Pa pi pi , ii pai ngeu ngau zen hi. Ih Pasian thu zuih na koi ah om hiam? Topa ki-it na koi lai ah zin sak kha mawk ih hiam? ki ngaih sun pha tek ni.

Khang lui hun lai a, it na ma suan a, nek leh dawn n ate in, Jesu Topa a na theih nai loh hang un, tu lai tak Jesu hong it lungdam na thu ih tang ko ko pen a mau te tua na nung ta khin zo uh na hi gige hi.
Tun Zo suan Pasian ta te aw, ih nun taak na hoih taak ki en kik leng, ki-it , ki ngaih nate tui bang kangh in she nel gam hong suak ta hi. Ih kam tawh Pasian ki um sak pha mahmah in, ii gam tat lu hek te in Zak oh cih mah bang in (Zk 2: 26) " Na sung ah kha om lo pumpi a si a hih mah bang in , gam tat hoih om lo upna a si hi." a na ci hi.

Pasian ii up mah bang in, gam tat na hoih tawh a mah biakpiak na ii neih theih ciang beek in, Upna picing a nei Christian thuzui te ih hi pan ding hi. Tua bang mi te Topa Jesu in (Mt 5:16) na sung ah "Midang te'n na gam tat na pha te uh a muh ciang un, Pasian min a phat na ding in, na khua vaak uh mi dang te nuai ah na tang sak un " a ci hi.

Khang thak Zo suan Pasian upna laiigil tawh ki dim in a om mite in, zu leh sa te tawh hong buai nawn lo ding a, pan mun hong la nawn lo ding a, Topa Jesu kammal om bang in, Jesu si leh sa tawh mun hong la ta ding a, ih Zo Ngeina sung ah hong lut sak tak ciang in, zu leh Sa te sila pan suak ta in, Jesu Topa sila ah ih gal kah ding aa, nun nuam lai tual nga bang leeng in, sim lei –ih nun tom kaal sung , Sian min phat in , zaai deih khiang ii siam ding hi.
Tua bang a hih man in, ih ngei na hoih lo te tuang nung sia in, ih ngei na hoih te khoh lo ma bang siam kik in, Se baal phung bang vuk kik leeng, tu ni-ih thu bulphuh a hi, " Zu leh sa in ngei na hiam? cih thu ih tel siam ding hi. Ih ngei n ate hoih tak kawm kik in, en pha ciat in, Pasian thu nung ta sung ah ih upna tawh puah thak kik ni, ci-in Zosuan tate khempueh kong han thawn hi.

Lungduai tak thu hong ngaih sak khempeuh te tung ah, ih Pa Pasian hong itna, Topa Jesu hong tat khiat na thupha leh Kha Siangtho Pasian panpih hun na in, hong om pih in, nun na ciik tui a luan na hong hi sak ta hen.
Ka Lungdam.