Zogam khuahun thum thu

Tuni ih kikup dingin Khua hun cih thulu nuai ah Zomite teenna ahi Zogam aa om khua hun thu ahi hi. Khuahun ih cih ciangin tulai aa thupiang gal le sa vai hilo zaw aa, nidang aa kipan ih pu ih pa ten a cepteh uh Zogam khuahun ahi khuavot, khualum, nisa, guahzu cihte ih kikum ding hi. Ih Zogam sungtengah khua a lum deuhna mun leh a vot deuhna mun zong om aa tua kha, tua ni tua kha aa kipan khua lum hun khua vot hun hi kici thei lian lo hi. A huampi in gen leng, Ih Zogam ah khuahun nam thum om aa tuate in Phalbi, Khuakhal leh Tuuk hun cihte ahi hi.

Phalbihun

Phalbihun ih cihpen khua vot/dam hun hi aa, ei Zomite kumkhen pawi ahi Khuadokha khit aa kipan ahi hi. Khuadokha khit ih cih ciangin September kha ahi hi.. Tua hi aa Phalbihun sung aa om khate in Octber, November, December leh January khate ahi hi. Zomite khasim dan leh kawlte kha simdan kibang ahih man in Zomite aa dingin Nokha, Kaukha, Theinosihkha leh Tunnkha ahi hi. kha bei kiim aa kipan hipha deuh hi. Phalbi hun ih cihpen khua hun ni dangin ihpu ih pa ten meiphualpi cih in, a kiim ah lupna gualuh aa, tua bangin phalbi na do uh hi ki ci ngei hi. A hangin zanpuan tampi neilo cihna zong na hi kha dingin ka um hi. Khuadam phadeuh ahih man in tangval zi neidingte bang phalbi hongtun ma in zi nei un na ki ci lianguh hi . A hangin phalbi hongtun kuan ciangin aan lak zong ki zota aa u leh nau veng leh paam mopawi bawl dingzong ki om zawdeuh hi ding hi. Ann lakkhit a hih mah bangin zu leh sa dingzong ki vaihawm thei zawdeuh ahi dingin ka um hi. Tuhun ciangin theihna khangto deuh aa, neih leh lam zong hong kilamdangin phalbi do nading puansilh leh zanpuan zong kicing zaw deuh in, phalbi, khuakhal leh tuuk hun cih omlo in mola kiteeng in ki om hi.

Khuakhalhun

Phalbihun hong bei aa huih hongtam pian in singtehte vul in kia aa, singteh note hong suak in tua khuahun pen Khuakhalhunkipat ahi hi. Tua khuakhalhun sung aa om khate pen Feb, March, April leh May khate ahi hi. Zomite aa dingin Dotakha, Dopikha, Zingkha leh Gamkha cihte ahi hi. Tua khuakhal hunpen nisuak zong kitel zawdeuh, meeikai zong tawm zawdeuh in vansiang aa, vasate zingthawh nuamsa mahmah in, pengpelep vasa te bang hamphadeuh hi kici hi. Hih bang aa khuavot hun a bei khut guahtui a tam madeuh hun sungpen khualzin gamvak zong kitam phadeuh se hi. Tua banghun pen khali sungbang hong hi-in, khamtung lambang cileng phalbi hun lai aa a lodinguh a kumkhat khawh dinguh lo te vatsa in koih uh aa, hih khuakhal hun sung mah in zong honghal uh hi. Hih khuakhal hun sungin tuuk a kumkhat zat dinguh singkhulte zong kiging khol uh aa khua khal hunpen kigin kholh hun zong hipha deuh hi. Khuakhal vengin guahtui hong luankuan ciangin hih a lovat sate uh pen hong keu mahmah aa halin, a kanglote kaikhawm kik uh hi tuapen mangtom ki ci hi. Hih bang aa mangtom a ki zawh ciangin khaici te kaikhawm in khuapi guah a zukma in tuh uh hi.

Tukhun

Tukhun ih cih pen Guahtui luan hun hong hi aa, Tua Tukhun sung aa om khate in June, July, August leh September kha cihte hi aa, Zomite khasim zia tawh ci leng Tangsihkha, Tangkha, Phalkha leh Khuadokha cihte ahi hi. hih Guahtui luan hun ciangin a ki vawh leh tuh khaicite hong po in khangkhia hi. Tua bang aa guah tuite hongkiat ciangin singkung lopate zong hong khangkhia aa tuuk hun cin ki ciamteh hi. Hih tuukhun pen a phadeuhin June khapan kipan in phalbihun hong hong tun mateng hi aa, kha 4 sungbang hong sawt hi. Tukhun ciangin thokangte hongtam phadeuh aa nat leh sat zong hongtam deuhse hi. Tua ahih man in thokangin hong peh lohna dingin zong kidal ding thupi mahmah hi. Phalbihun ciangin khua hong dam mahmah ahih man in puan a lum zawdeuh silh in, khua khalhun ciagnin huih lak aa om vuikhu te ih dik lhak loh nading kidal aa, Khuahun zui in nikten puansilh, annek tuidawn zat siam in cidamna dingin ih ki dal kholh ding athupi mahmah khat hi.

Ka lungdam.

Add new comment

1 + 0 =