Nuntakna hongpia singkung

A kipatcilin Pasian in a kicingtak leh natna satna bang mah a om lo dingin vantung leh leitung a bawl hi. Leitung in singkung, paakkungte tawh et lawm mahmah aa, vantung zong nopci mahmah hi. Vasa, gamsate leh mihingte in a etlawm mahmah leitung ah nuamtakin nungta in om uh hi.

Pasian in leitung aom nate khempeuh a zangh ding leh a kemcing dingin mihingte thu apia hi. Ahi zongin mihing te in amaute’ huaihamna hangin leitung pan apiang na te phengzat in om uh hi. Tua bangin singkung lopate aphengzat na uh hangin leitungah khuahun siatna, guahtui leh tui ki cin lohna (or) guahtui tamluat manin mualte kicimin lampite kisiatna, gamsate ci beina leh ox hongpia ding singkungte tawm semsem ahih manin natna tuamtuam hong piangna, cih bangin siatna te hong piang hi.

A beisa kum sungin leitung bup tawh kisai UN zum panin singkung, paakkungte suan ding hong hanthot mah bangin Pope Francis in zong singkung, paakkungte leh leitang te kepcing na ding lai (Laudatusi) a hawmkhiat na thu te ih thei khin hi.

Tua ahih manin ei mihingte in khutkhattawi, khekhatkhai khawmin ih leitung ih zun ding, ih kep ding hong kisam pha mahmah hi.

Sanggam aw, singkung khat ii thupitna na tel nai hiam?

Kum (100) apha singkung khat ii manphatna tuat le hang dawlar teng tampi man ding hi. Tua singkungin kum (100) sung tawntung, mihingte diik dingin Oxygen hong pia in, leitang hong kepsak, khuahun aman na dingin hong kepsak, vasa/gamsate a tawlngak nading in ama lim pia, mihingte’ dawn ding tui hong kepsak, natna tuamtuam apiang sak thei huihnin lo te hong dalsak hi. Tua hi a, singkung khat ii manphatna in suangmanpha khat sangin tampi in lian zaw hi.

*Singkungin na nuntak na dingin oxygen hong pia aa, nang na hih leh tua singkung na phuk hi.

*Singkungin nuamtakin natawlngak na dingin aliim hong pia aa, nang na hih leh tua singkung liim beel kawmin a hiangte na sattan hi.

*Singkungin nanekding leh nadawnding an leh tui hong pia aa, nang na hih leh tua singkung phukin na zuak hi.

*Singkungin na teenna leitung pen ahoih mahmah mel namkim tawh hong zep sak aa, nang na hih leh tua singkung a mel asiat nadingin meihalin na susia hi.

Sanggam aw.. singkung apau thei hi zenzen leh nang kiangah bang hong gen in um na hi hiam?

#Singkung om kei leh mihingte, kei leh nang ih nungta zo kei ding hi. Tu-in Leitung hong lum semsem ta hi.

Sanggam aw..singkung khat beek ih suan zawh nading hanciam ni.

Singkung suanna, kepna tawh leitung kemcing ni.