Ngeina leh Biakna Tawnzia

Ei Roman Catholic thuzuite in, a mimal bekin a kituisawp Christiante bek hilo ding hanga, I ngeinate zong a nungta Pasian kammal tawh siansuahin Christian ngeina i suahsak ding kisam hi. Khua siansuah I kin mah bangin, lungsim siansuahna kisam zaw kan hi hang. Tua ciang bekin Lungdamna thu Pasian kammal in I minamte lakah zung hong kha in, gah hoih gah pha hong gah pan ding hi. A kikhel ngei lo lungdamna thu pen I pupa ngeina hoih, lungdamna thu tawh a kilehngat/kitukalh/ki-elpuak lo thute sungah khaici banga I vawh ding kisam hi. Tua bang ciang bekin I Christian biakna pen Zogam Christian biakna leh tualsuak/sung Christian biakna (Contextual Christianity) hong suakin, Christu zong I minamte lakah hong zual in hong teektang thei pan ding hi.

Tua ahih manin ei Zomi Christiante in kum zalom sawmnil le khat sunga I nuntakzia dingte gelkhawl khawlin, I nuntakna sungah biakna le ngeina tawh kituakin picing taka I nuntak zawh nading, Pasian kammal tawh, I ngeina, I upna le I gamtat I luheknate I nuntakna sungah I nosuahsak zawh nadingin hanciam ni.

Christu in Zomite Topa taktak hong hih ciang bekin, Zomite in zong Christian picing taktakte I hi pan ding hi. I biakpiaknate a cidam ciang bekin zong, Christian picing nuntaknate zong I nei zo pan ding hi. Cihnopna ah, Tuucing te’n a tuute lonona leh tui omna ah hong mapi ding, a damlo, a cinat kem siam ding, a mangte zong hong zong ding; Sitni te in, thuman thutak tawh na hong sem ding; sangsiate in deihsakna takpi tawh sangnaupangte lai hong hilh ta ding; siavuan siama te in cinat itna lianpi tawh hong kem hong khoi ding; sangnaupangte in zong lai pen deihna lianpi tawh pilna hong zong ding; khuanu khuapa, gam ukte in zong cihtakna lianpi tawh taangpi taangtate khantohna ding na hong sem ding; sum lei sum zuakte in zong, lamdawt tawn nawnlo in lampi man le Pasian deihna tawh kituak in sum hong zong ta ding; etc. Tua ciang bekin, Zomi Christiante in, kha thu, taksa nuntakna, pilna siamna leh, Pasian thuthuk/laigilte ah, a ciang a ciang panin, din mun namkim pan lawh cingin I khangtho pan ding hi.

I Kawlpi Siampi Lian uk sung leh leitung mun tuamtuam ah a om thuzui u leh nau Nu leh Pate khempeuh, I lungsim sehnel gam sungah Baptaizpa John ii hong thuhilhna tawh kizui-in: I kiphatsak, I kiliatsak, I kiuawngsakna mual sangte kiniamkhiatna tawh totamkik ni! I thanemna guamthukpite Topa’ thahatna tawh vuk kik ding hanga; I gitlohna, I lungsim kawinate Topa’ thudam/nem tawh tangsak kik in, I Topa tawnsak ni! I lungsim bawng an kuang sungah Topa suak sak ciat ni!

Topa Jesu I Jubilee letsong ahi, ki-itna, kilemna, mawhmaisakna leh lungnop/lungmuanna thuphate, note khat ciat tung leh na innkuan, na bangkua sung uh ah hong tung kim ciat ta hen!

Lungdam.

Add new comment

6 + 0 =