Khuahun leh Cidamna Thu

Christu sungah kong it Nu le Pa, U le Nau te Khua hun cih thulu nuaiah cidamna ding thu pawlkhat kikum dih ni!Pope Francis in Leitungah singkung lopate leh kiim leh paam keemcinglo in ih om leh heelkhuk sung aa a nungta tawh kibang ding hi hang ci-in na gen hi. Leitung mipilte in singkung tungpan in huih siangtho ih diikding hong paikhia ci-in na ciamteh uh hi. Khuahun a hoih nading in zong singkung tungah ki nga hi na ci lailai uh hi. Ih Zogam ahi khamtungah mencim leh leikia cihte pen singkung hoihtak in a po lohna hang hi cih ih mit aa ih muh ahi hi. Ih kiim le ih paam ah singkungte ki lim phuk lua mahmah ahi manin khua hunte nidang hong bang thei nawnlo aa, ni a sat cingin sa lua, guahtuite tawmlua in lokhote in zong nidang bangin a hun zui-in gui leh gahte hoih takin neizo nawnlo uh hi. Khai kungte in gui le gah hoih a neih theina dingin zatui tawh a ki bawltawm (Chemical) nate ki lim zat mahmah aa cidamna dingin zong hoihlo hi ci-in cidamna lam pilna neite in na gen uh hi. Ih pu ih pa te hun lai-in natna a pia thei lungnote tawm zaw aa kum tampipi a dam deuh uh tawh ki bang hi. Tu hun khangthakte aa dingin natna lungno a tam deuh leh nuntakna a tom deuh tawh kibang hi. Leitung muntuamtuam ah natna satna leh a lauhuai mahmah sih baih theina lungnote zong om aa mihingte in khangno upa cih omlo in sihna mual hong liamsan tam mahmah uh hi. Hih hamsatnate pen a hong ki pat khiatna bulpi in khua hun a ki khelna hang leh zatui tuamtuam te hang hi aa, khuahun ki khel-in a ngei a bat nawnlohna a hangin singkung lopate a bei semsem na hang, kiim le paam a ki lamdan na hang, setvan tuamtuamte pan aa hong pusuak a khu leh mei kangte hang aa huih nin pan aa hong piang ahi hi. Zatui pawlkhat te a hih leh tawmvei lungnopna ding bek aa ki bawl hi aa, pawlkhatte a hih leh mimal phattuamna ding bek ngimna tawh a lawh cing ding ut man aa ki bawl ahi hi. Hih bawltawm van hoihlo pawlkhatte hangin nuntakna tomsak in, ci le sa zawngkhalna zong hong piang sak hi. Hih bang hamsatna te a pian lohna dingin zatui hoihlo te nawlkhin in, huih siangtho dikna ding singkum lop ate thupi bawl it bawl in keem cing aa, khuahun tawh kizui in annek tuidawn zat siam ding a ki hanthawn hi hang. Ka lungdam.