Khua hun leh cidamna

RVA a en a ngai kong it nu le pa, u le nau te tu hun laitak pen khuahun ki khelin guahtui hong luang hi. Hih khua hunki khel ciangin nat leh sat hong tam deuh se hi. Nat leh sat lakpan in khuasik, sungpai leh sisa, bukkhuh cih te hipha deuh hi. Tua natna pen a tamzawin piteek leh puteek, naupang cihte hi pha deuh hi. Bang hang hiam cih leh a maute in natna lungno leh khuahun kilaih ziate thuak zolo pha deuh uh ahih hang ahi hi. Hih bang hun ciangin a kua mahpeuh ih ki dal kholh theih ding a kisam mahmah ahi hi.
Khuasik cih pen thokangpan aa kilawh hipha deuh aa, thokangin hong peh lohna dingin kikep ding thupi mahmah hi. A diakdiak in zan ii ih mut laitak in thopuan khungin tua lo hunte ah zong thokangin a hong peh loh nadingin ki dawmpha mahmah ding hi hang. Thokang ih cih pen tuitungah tui nei-in a note tampi a khangkhia hipha deuh hi. Ih inn kimah tui kholna leh tui a ki cinnate a siangtho ding leh a sin nei-in bawl aa a kihongsa in ih koih loh nading a thupi mahmah khat ahi hi.
Sung lam hoih lo, sungpai cih pen a tam zaw nek leh dawn hang hi pha deuh hi. Hih sunglam hoih lohna a pian lohna dingin nisim in ih dawn tuipen a siangtho tui bek ih dawn ding kisam hi. Tui bek tham lo-in an-neek zong a siangtho leh a limci si leh sa deih theih a hih ding kul aa, a hun zui-in nek leh dawn kidawm aa a val lua leh a ki cinglo lua cihte omsak loh ding ahi hi. Tui tampipi dawn na in ih gilsung hoih sak bek tham lo-in ih kal zong siangsak aa pumpi cidam na dingin tui-in vaipuak lianpi nei hi. Pumpi lam pilna nei te-in mihing khat tungah 60% (za ah sawm guk) bang tui ahi hi ci-in na gen khia uh hi. European Food Safty Authority (EFSA) te-in ni khat in picing mi khat in tui litres 2-3 kikal bang dawn ding hoih hi na ci uh hi. Tua ahih man in ih cidam na dingin tui tampipi dawn ciat ni. Tui tampipi dawn zawh loh man in zong cisa ki nei thei hi. Pumpi sungah cisa a om na a hangpen natna lungno hangzong hi thei hi. Natna lungno leh ih pumpi a ki sukkhak ciangin cisa piang thei ci ahih man in ih ci a sat leh siahuan siamahte ngeiah ki lak in hong piak uh zatui zahate hoih takin nek ding ahi hi. Cisa tam lua leh zong ki lua thei hi. Hih bang dinmun ih tuah lohna dingin huih siangtho dik in ihmut cim tak in om aa, an limtak ne in, tui limtakin dawn peuh le hang ih pumpi cidam tha hat in natna lungno hangin zong cisa cih ki nei lo zaw deuh ding hi.
Bukkhuh cih pen namtampi on in, a hong pian khiatna pen huih hoihlo, huih nin, natna lungno leh khua hun hang hi pen hi. Huih hoihlo leh huihnin cih ciangin vuikhu leh meikhu cih bang a tuamtuam om hi. Ih nak tawh ih zak theih gimnam cih pen huih lak aa a leng a om na hang hi aa, tua bang gimnam lakah ih pai ciangin ih nak leh mukte tuamin limtakin kidal ding hi hang. Khua hun a vot leh a lum a ki lamdan vat luat ciangin leh guah thuakna, huih vot thuak luatna hangin zong bukkhuh ki vei thei hi. Hih te tawh ki  pelh theihna dingin khualzin gamvak ki dawm aa a hun tawh ki tuakin nikten puan silh ih zat ding kisam mahmah hi.
Topan cidamna thupha hongpia ta hen. Ka lungdam.