Tui phumpa Johan ngawng ki tan na ni. (Aug-29)

Tui phumpa Johan in Judea gam aom Zachariah leh Elizabeth te ta pa hi. Kum 30 a phak hunin Mesiah hon pa hong pai nading, ki ging kholh nadingin Jordan gun dung ah Pasian thu tangko in om hi. A ma thu gen na, a vaipuak, Topa Jesu in tui phumna a sang khit ciang in man siang hi.
Tua zawh a sawt lo-in Kumpi Herod in a sanggampa zi tawh amawh na thu, mi pi mai ah mawhsakna gen a hih manin ki man hi. Tua pan ki pan Herodias in Johan muhdah in thah ding ngim hi. Herod kumpi pa suahni pawi Party ah Herodias ading hun hoih khat hong piang hi.
Tua pawi ah a tanu laam a, Herod a lung kim mahmah ahih manin na deih bangbang hong gen in, kong pia ding hi ci-in ki ciam hi. Numeino zong anu genna bangin tuiphumpa Johan lutang a ngen hi. Kumpi pa zong alung nop lo hi mah ta leh a lengla te mai ah maizum nuam lo ahih manin Johan ngawng tan dingin a na sem te sawl hi. A na sem te in zong kumpipa sawlna bangin Johan ngawng tan in a lutang kuangdai sungah koih in numeino pia a, numeino in anu pia sawn hi. A sawt lo in a luang hawm a nungzui te in la in vui uh hi. (Mk 6:17-29)
Misiangtho tui phum pa John bangin thuman a sihpih ngam te, thuman thu tak tawh anungta te ih suah zawh na dingin hanciam ciat ni.
Misiangtho John the Baptist aw…Kote adingin thu hong ngetsak in.