Tonu Maria min siangtho pawini. (September-12)

Tonu Maria ii min siangtho pawi, September (12) ni-in a kibawlna thu
Nu Pawlpi in kumsim, September (12) ni sialin ‘Tonu Maria min siangtho pawi bawl den hi. Hih pawi pen kumzalom (16) hun pan kipan hi. Ahi zongin tua hun lai-in bangni in bawl ding cih ki ciangtan nai lo ahih manin amau lem hun ciatin amau mun tekah bawl uh hi.
Tu in ahih leh Nu Catholic pawlpi in September 12 ni-in bawl ding ki ciamteh in tua ni-in ki bawl den hi. Nu Catholic pawlpi in pawi nam (4) ih neihna sungah hih pawi pen a nam (4) na sungah ki hel hi. Tua a nam (4) na pawite pen bawl leh zong kingahin bawl kei leh zong ki ngah hi. Hih pawi in September (8) ni-in ih bawl ahi ‘Tonu Maria suahpawi’ tawh ki zawitawn hi.
Nu Catholic pawlpi ii laibupi sungah hih pawi pen 1513 kumin Spain gam, Cuenca ah kibawl masa in, Tonu suahpawi bawl zawh ani 8 ni-in ki bawl hi, tua ahih manin September 15 ni-in bawl den uh hi. Pope Pius V na in September 17 ni-in bawl dingin a ciangtan kik ciangin 1587 kum, June 16 ni-in laih leuleu uh hi. Tonu suahni leh Tonu min siangtho pawini ni 8 a ki halna in Topa Jesu a suah khit ni 8 ni-in a kibawl ‘Jesu min siangtho pawi’ bawl bangin a gel uh ahi hi.
Topa Jesu min siangtho pawini in Jew minamte tungah Moses tungtawnin Pasian in apiak ahi thukham ‘vun atna’ tawh ki zawitawn hi. Tapa khat a suak simin a suak zawh ni 8 aphak ciangin biakinn ah ap-in vun atna nei den uh hi. Ni 8 pha khinin vun at-na angah khit ciangin ‘Jesu’ ci-in min phuak uh hi. Tua minin Vantungmi in Tonu Maria kiangah thu azak sak lai-in apiak min ahi hi. (Lk 2:21). Tanumei a suak Jew te in ahih leh tua bang thukhun omlo hi. Ahi zongin tanu a suah zawh a sawt lo-in min phuak pah uh hi.
Kumzalom (17) hun ciangin hih pawini pen leitung mun tuamtuamah bawl na dingin hanthawn in pawini zong ciangtan kik hi. Tua a ciangtan ni pen September (12) ni ahi hi. Bang hangin tua ni-in ciangtan hiam cih leh tua ni- in (1683 kum, September 12)ni-in Turkey te khut sungah akia ahi Vienna gam pan Sobieski a lak kik zawhni uh ahi hi. Tua ni phawk kik na ding cih ngimna tawh Pope Innocent XI na in hih pawini pen leitung mun tuamtuam aom Pawlpi in a bawl na ding leh Tonu suahni pawi bawl khit ni (8) ni-in bawl na dingin ciangtan hi.
Ahi zongin 1908 kum ciangin khat vei laih leuleu aa, Tonu Maria suahni pawi bawl zawh a tung masa pen nipi ni-in Tonu min siangtho pawi bawl dingin khen tat kik hi. Tua ni pen Sobieski zawhna ni-in a ki ciamtehni ahi hi. Tonu in tua gualzawhna ah Christian galkapte huhin panpih hi ci-in upna nei uh hi. Tua ahih manin tua hun lai a, a lian bel Siampipa in tua gualzawhna pawi pen Tonu min siangtho tawh a ki nai thei penin bawl den hi.