Pope St. John Paul II (October 22th)

Pope St. John Paul II in Poland gam, Wadowice khua-ah 1920, May 18 ni-in suak hi. A neu min pen Karol Jozef Wojtyla hi. 1946 kumin, Siampi ordination ngah hi. Tua khit ciangin Italy gam, Roma khua-ah Theology sin dingin sawlna ngah a, lai sin aman ciangin Poland ah ciah kik in paina ciahna ahaksa diak mun te ah Parish Priest ahuh dingin om hi.

Tua khit ciangin College khat ah sang naupangte’ kha khantoh nading in makaih a, khangto mahmah hi. Tua bangin Pasianna asep kawmin Philosophy pilna sin kawm a, aman ciangin Poland aom, College khatah hilh sawn hi. 1958 kumin, Assistant Siadaw za ngah a, 1964 kumin, Assistant Siadaw pan Diocese uk Siadaw za ngah hi. Tua zawh kum (3) khit ciangin Cadinal dingin teelna ngah a, 1978 kum in a lian bel Siampipa dingin teelna ngah hi.

Pope a suah ciangin ama mai aa Pope ii min ahi John Paul mah la in, Pope John Paul II ki ci hi. Amah in kum (455) sung, Italy gam mi Pope te lak ah Italy ahi lo gamdang mi Pope masa pen hi. Pope John Paul II in Christian te ki pumkhat nading, upna ki banglo pawlpi khat leh khat kipawl khop theih nading, khat leh khat ki theih semsem nadingin kimuh khopna te ah hanciam mahmah hi. Tua gelna a tangtun na dingin 1986 kumin, Assisi khua ah Leitung bup ki lemna ngah na dingin leitung bup Pawlpi lian te pan makaipi te samin thungetna nei uh hi.

Tua ban ah Catholic leh Muslem te kikal kizopna ahoih zaw dingin sem khia zo hi. 2000 Jubilee pawipi in Pope John Paul II ii Pasian nasepna sungah amanpha mahmah leh a ciapteh huai pen kum hi. Catholic leh Orthodox te kikal, kizopna khang sak hi. Topa Jesu in leitung leh mihing te ii phualpi hi cih lungngaihna tawh 1979 kumin, Redeemer of the Human Race thulu tawh amasa pen laipi thohkhia hi. Ama Pawlpi makaih hun sungin leitungbup khangno te pawipi bawl kipan a, gam tuamtuam ah abanbanin bawl kawikawi hi.

Pope John Paul II nuntakna sungah aminthang pen man in 1983 kumin, amah thau tawh akap sim pa kiangah pai-in mawh maisakna alahna man hi. Amah in kum (27) sung Pawlpi lam honglak in hong makaih hi. Tua hun sung teng laipi (14) hawm khia a, Misiangtho (482), Blessed (1338) pahtawina pia hi.

Pope John Paul II in Parkinson’s cih natna ngah a, tua natna tawh 2005 kum, April 2, ama kum 84 hunin si hi. Pope Benedict 16 in Blessed ci-in 2011 kumin tangko a, Pope Francis in 2014 kumin misiangtho suak hi ci-in tangko hi. St. John Paul II pen khangno te a it mahmah khat hi.

Misiangtho Pope John Paul II aw….Ko te adingin thu hong ngetsak tan.