Misiangtho Zoe of Rome Pawini. (July – 5)

Sam pan singkung ah henin a nuai ah a kuang mahmah mei, Christian suak kei leh nuntakna ding lampi om hi mah taleh Pasian tunga a koih, upna tawh a nuntakna apiakhia misiangtho Zoe.

Zoe in Rome a om, a hau mahmah innkuan sungpan suak hi. A pasal pen Nicostratus hi-in, Rome law lamah mipil khat ahih banah Misiangtho Sabastian thong a kiat lai-in a thong cing pa zong ahi hi. Tua hun pen Roma Emperor Diocletian uk hun hi a, Christian te manin a bawlsiat hun in Sabastian zong kumpi mat na a thuak ahi hi.

Zoe cih numei nu in kum (6) sung, a pau thei lo khat hi a, Misiangtho Sabastian in ama tungah Singlamteh ciaptehna bawl in thu a ngetsakna pan a pau kik thei khat ahi hi. Tua bangin Zoe a pau kik theih ciangin a nupa un, Misiangtho Sabastian kiangah tuisawpna sacrametu ngenin sang uh hi.

Tua bangin Zoe a pau theih kik na thu tawm tawmin hong thang hi. Tua ahih manin Zoe in Pasian thu lam ah hanciamin Pasian tungah hong citak mah mah hi. Ni khat, St. Peter han ah thungenin a pai laitak, Emperor ii matna thuak hi.

A Christian hihna nusia leh nuntakna ngah ding himah taleh Zoe in ama upna khaksuah lo-in kiplet hi. Tua ciangin a sam pan singkung tungah khihin a hingtangpi in mei halna thuak a, meikhu te a diik na tawh AD 286 kumin Rome, Italy ah si hi. A luang pen Tiber gun sungah paai uh hi.

Misiangtho Zoe aw…kote adingin thu hong ngetsak in.