Misiangtho Zita

Monte Sagrati khua ah Pasian’ thu a hahkat mahmah innkuan sung panin St.Zita piang hi. Zawng uh ahih manin kum (12) a phak ciangin a khua uh pan tai (8) a kigamlatna Lucca khuapi ah mihau innkuan khat’ inn teng dingin pai hi. Kum 48 a phak dongin tua lai ah inntengin om suak a, a nasepte zong zo mahmah hi. A nasep dingte a mangngilh loh banah zan ciangin zong mawhna dan lohna-in Pasian bia-in thu a ngen zelzel hi.

Zingsang simin Missa biakpiakna ah kihel den a, an tanna zong a bawl tawntung hi. An a tanna ah ante pen an nei lote nesak hi. A inntekte’ mawh zonna, lungkim lohnate thuak tentan hi. Missa biakpiakna ah a kihelna hangin zong nasem nuam lo hi, cih mawhsakna a thuak hi. Ama thuak zawha leh a kiniamkhiatnate’ hangin a inntekte in ama tungah muhdahnate nei nawn loin amaute’ lawm leh amaute thu a hilh mi thupi khat bangin ngaihsun theita uh ahih manin ama tungah zahtaknate hong nei ta uh hi.

    St. Zita in ama hun nunungte ah ama kipiakzawhna ahi cinate kepna le mi cimawhte huhna ah a hun khempeuh a piakzawh nangin innteng nasep panin khawl hi. Deihsakna leh hehpihna nasepna ahi cina kepnate nakpitakin sem hi. Kum (60) a phak ciangin siha nuamin si a, a luang pen Lucca khua-a St. Frediano biakinnpi ah kikoih hi. A luang muat lo a 1446 kumin khatvei, 1581 kumin khat vei, 1652 kumin khat vei a et uh leh muat tuan loin a ngeina mah bang den hi. Misiangtho Zita pen inntengte a huh Misiangtho in kiciamteh hi.