Misiangtho William of Vercelli Pawini. (June – 25)

Misiangtho William in 1085 kumin Italy gam, Vercelli khua a om mihau nu leh pa sungpan suak hi. Ahi zongin amah asuahzawh a sawt lo-in a nu leh pa in sih san ahih manin William pen a tanau te in kem uh hi.
Kum (14) a phak hunin Spain gam, Santiago de Compostela ah a pai na pan William in amah leh amah mawhdan lohna in a pumpi sik khau tawh henin a khua zin na lampi ah khe tawh pai hi. Tua lai panin ama nuntakna pen zateih hihna tawh Pasian tungah ap dingin khentat hi.
Tua pan Italy ah a ciah kik ciangin Jerusalem ah khualzin suak dingin ngimna nei hi. Tua ahih manin ama khualzin kipan kik a, ahi zongin lim kal ah guta te ii bawlsiatna thuak hi. Tua ciangin William in Pasian in amah pen tua lai munah Pasian thu tangko ding, Pasian thu hawmkhia dingin hong lak hi ci-in ngaihsun a, Monte Vergiliana ah zateih hihna tawh om suak hi. Tua lai munah mittaw khat, thungetsak in damna ngahsak kik ahih manin mitampi te’ pahtawina ngah hi.
William ii aminthang mahmah ama siangtho na hangin mi tampi in Monte Vergiliano pen hong thei tektek in ama nungzui in zateih suak nuam zong hong tam sem sem hi.
1119 kumin William in Benedictine te zuih thukhun te siksan in ki pawlna khat phuan a, Siampi inn zong lam hi. Ahi zongin William ii thukhun khauh lua hi ci-in zateih pawlkhat te sungah ki sel na piang hi. Tua ahih manin 1128 kumin William in a lawm pawl khat te tawh tua mun pan pai khia in Italy gam, Naples ah ki tuah uh hi. Tua lai ah William te ki pawlna pen Monte Vergine/ Williamites ci-in ki sam hi. Tua mun ah William in Naples kumpi ii thu dot khat hong suak hi.
Nikhat, kumpi kiangah William a hawh laitak in kumpipa leh numei paktat khat in zateih William ii upna a ze-et nop man un, William ii lupna khan sungah lut ding hamciam hi. Ahi zongin William in a lupna ah mei am te koihin lum suk a, tua numei nu zong ama hih dan in a hih dingin sam hi. A nunung ciangin tua numei zong ki sikin ama nuntakna zong ki khel hi.
William ii minthan na thupiang khat in, nikhat William om na Monte Vergine tawh a ki gamlo mun ah Gia khat in Ak te, Keel te manin ne lum zel hi. William ii La nangawn a them a neng in pet lum hi. Ahi zongin William in Pasian kiangah tha khauhna ngen in tua a gilo mahmah Gia pen a thumang ganhing khat in ki khel sak zo aa, tua Gia pen inn khawi ganhing khat in a sang ah khawi hi.
1142 kum ciangin William dam lo-in a ci hong na in Italy gam, Sant Angelo dei Lombardi ah June 25 ni-in si hi.
Misiangtho William of Vercelli aw…kote adingin thu hong ngetsak in.