Misiangtho Tychon of Amathus

Misiangtho Tuchon in mizawng khat hi aa, Lenggah huanno khat aneih hangin a suan ding lenggah kungno lei nading nangawn sum nei lo hi. Tua ahih manin a huan veng te in Lenggah hiang tannin a paih te uh tawmin Tychon in suan hi ki-ci hi.

Tua asuan Lenggah hiang te a sel hun angak kawmin Tychon in Pasian kiangah thupha nam (4) ngen hi. Tua thupha te in…Lenggah hiang te pan a dawn asel na ding, tua a sel te cipha in gah hoih agah na ding, a gah te a khum na ding leh tua Lenggah in a dangte sangin a min masak na ding cih te ahi hi. Kum khat a cin ciangin Tychon ii Lenggah huan pan lenggah te in hong min baihin a lamdang mahmah limna tawh kidim hi.

Cyprus tuikulh a om, Limassol khua pen kumzalom 15 hunin Amathus ci-in mitampi in thei hi. Tua lai aom Lenggah lo nei te in Misiangtho Tychon pawini pen kum simin bawl den uh hi. Misiangtho Tychon pawini pen kum simin June 16 ni-in ki bawl den hi. Misiangtho Tychon ii thupha bawl na hangin Cyprus tuikulh a om Lenggah te in hun dang sangin min baih zaw den hi.

Mi pawlkhatte in Misiangtho Tychon a om takpi mah hiam cih thu dotna nei uh hi. Ahi zongin Tychon in Amathus ah nungta in om takpi aa, Amathus ii Siadaw khat zong hi ci-in mi tampi in um-in sang uh hi.