Misiangtho Thomas Pawini. (July-3)

  Misiangtho Thomas in Galilee khua mi ahi hi. Topa Jesu tungah upna lian nei mah taseleh Topa Jesu in sihna a thuak khit ciangin nungzui dangte tawh om khawm lo-in amah kia tuam om a, Topa Jesu sihna pan athawhkik zawh, nungzuipi te kiangah aki lah laitak in amah om lo ahih manin aum kei hi.

Topa Jesu anih vei na, nungzui te kiang a ki lah ciangin Topa Jesu in “ka liamma te sungah nakhutme thun in, um khial ken la, um taktak in” acih ciangin Thomas in “Ka Topa, ka Pasian” ci-in gen hi. Tua ciangin Jesu in “nangin nong muh manin nong um hi. Hong mu lo pi a, hong um te in thupha ngah ding uh hi” (Jn 21: 24-29) na ci hi.

Khasiangtho Pasian hong kum zawh nunglam ciangin Thomas ki manin India gam, Gundafor ah sila dingin ki paipih cih pawlpi tangthu tungtawn in ki thei hi. Thomas ii siamna kumpipa in atheih ciangin kumpi inn hoih mahmah khat lam sak a, ahi zongin Thomas in kumpipa om loh kal in inn lam nading sum te mizawng te na pia hi. Kumpipa hong tun ciangin a inn lamna thu dong a, Thomas in kumpipa aw tu in na mu thei nai kei ding hi. Hih leitung pan na paikhiat khit ciangin na mu pan ding hi a cih ciangin kumpipa heh lua in, a hing tangpi in avun ahawk nading thu apia hi.

A hi zongin kumpipa sanggam pa in amang sungah Thomas in kumpipa ading vantungah a lamsak innpi amuh na thu a gen ciangin kumpipa in Thomas khah kik in amah leh a nasem tampi in tuisawpna sang uh hi. Tua khit ciangin Thomas in India gam sung ah pai kawikawi in Pasian thu tang ko a, kumpi Mazday zi ki khel sak in Christian asuak na hangin kumpi pa tawh kilemloh na hong piang a, Thomas mual tung khat ah sam in a that uh hi.

Misiangtho Thomas aw…Kote adingin thu hong ngetsak in.