Misiangtho Thomas Becket Pawini. (December - 29)

Canterbury ii siadawpa ahi, Thomas Becket in 1118 kumin London ah suak hi. Kum (25) aphak hunin Deacon suahna ngah aa, Canterbury ah tavuan piakna ngah hi. Kum (10) a sawt khit ciangin Kumpi Henry II na in Becket pen kumpi inn ah thuzekpi (chancellor) vaipuak pia in na sem sak hi. Tua kumpi inn ah cihtakna tawh kum (8) sung kumpi na a sep khit ciangin England gam ah pawlpi makai pi dingin Canterbury Diocese ii Siadaw suahna ngah hi.
Tua khit ciangin Kumpipa piak thuzekpi (nasep) pan khawlin pawlpi sungah ngah ding akilawm suahtakna te kep/zun kipan hi. Pawlpi thukhun, Canon law tawh kilehbulh in 1164 kumin kumpi in Becket pen Constitutions of Cloredon ah letmat thuh dingin a sapna pen Becket in nial hi. Tua hangin Becket in Piantit gamah hawlkhiatna ngah hi.
Piantit ah kum (6) sung a om khit ciangin England ah 1170 kumin ciah kik aa ama Diocese sunga om Siadaw sang pi ah kumpipa nasem mi (4) te’ thahna thuakin si hi. Becket asihzawh kum (3) khit ciangin Blessed in ki pahtawi aa, “Canterbury Siadaw pa ii han khuk in Europe gam sungah a minthang mahmah thungetna phualpi khat hong suak hi.
Misiangtho Becket aw…Kote adingin thu hong ngetsak in.