Misiangtho Theresa of the child Jesus. (October 1)

Theresa in Piantit gam, Alancon khua ah 1873 kumin suak hi. Anu le Pa pen Misiangtho Louis Martin leh Misiangtho Zeilie Martin hi a, Pawlpi sungah nupa kop a misiangtho a suak masa te ahi uh hi. Theresa te pen unau (9) pha uh aa, amah a neu pen ahi hi. Unau (9) sung pan 4 aneu lai-in si uh a, a dam (5) te ahih leh a vek un nungak siangtho suak uh hi. Theresa pen aneutung pan dam lo a, kum 8 a phak ciangin Tonu’ thungetsakna hangin anatna pan damna ngah hi.
Theresa in aneu tung akipan mite’ tungah itna lak hi. Siangtho Pumpi sanna angah ding ciangin pumpi kidekna tampi bawlin kigingsa in om hi. Amah pen Topa Jesu’ lawm it mahmah khat ahi hi. Theresa in “Kum 3 ka phak akipan Pasian aading ahih nak leh nial ka nei ngei kei a, Pasian tungah ka itna bek pia in tua longal adang bangmah ka pia ngei kei hi” ci hi. Ama Vocation pen 1886 kum, Christmas pansik nitak, naungek Jesu ii thuthukna mang amuhna pan kipan hi. Kum (15) aphak ciangin alianbel Siampipa (Pope) ii phalna (Papal dispensation) tawh Lisieux a om Carmelite nungak siangtho sinna sangah lut hi.
Ama thu bulphuh kammal in “itna bek tawh kipiakhia kik zo hi” cih ahi hi. Nungak siangtho sangah a om laitakin amah in nalamdang bang mah sem lo-in, nisim ama nasep vaipuak te hoihtak leh picingtak in sem in, asep peuhpeuh Pasian tungah ap den hi. Amah in Laisiangtho simna tawh hehnepna zongin athuak haksatna, natna te upna tawh sangsiamin thuak siam hi. Nungak siangtho alut nuamte amakaih dingin vaipuak angah ciangin amaute in kiniamkhiatna leh siangthona aneih na dingun kam tawh hitaleh, gamtatna tawh hitaleh hilhin lak hi. Ama gelh ahi, “The story of a Soul” cih laibu sungah “Kei-in Pasian kiangah thu neuno te tawh a ki-ap, Kha neu khat ka hi hi” ci hi. Amah in Kha te hotkhiat ding bekbek lunggulh hi.
Thungetsakna leh zawngkhal tak a pumpi kidekna te tawh Siampite kha hotkhiat nasepna panpih hi. Ama zuih, athu meilet ahi, ‘Lampi neu’ acih pen “naupang khat bangin Pasian tungah upna, muanna leh itna” ahi hi. Amah in “Kei-in misiangtho Agnes bang ka hi nuam hi, a zenzen in ngaihsutna tawh ahih zo kei leh zong itna tawh ka hi zo ding hi” ci hi. Theresa in asih kuan ciangin a awm tungah Singlamteh koih a, vantung lam en kawmin, “Topa aw, kong it hi” ci hi. 1897 kum, a ma kum (24) aphak hunin si hi. Pasian nasepna ah thungetna leh nasepna in khat leh khat kizom hi cih lahna in 1927 kumin, St. Francis Xavier bangin Pasian nasemte (Missionary) te a huh misiangtho in ki tangko hi.
Misiangtho Theresa aw…Ko te a dingin thu hong ngetsak tan.