Misiangtho Teresa Benedicta Pawini. (August-9)

Pasian a muh nading a zon kawmin ki cinna neilo mihing te sung panin Misiangtho a suak te nuntakna a ngaihsut kawm leh amaute gamtat hoihna te etteh in a zuih khit ciang amah mah zong Misiangtho a suak ahi Misiangtho Teresa Benedicta of the Cross in 1891 kumin suak hi.
Amah pen Topa Jesu singlamteh ii Misiangtho Teresa benedicta ci-in mi tamin thei hi. Teresa Benedicta in Germany gam, Kippur ah a minthang mah mah Jew innkuan sungpan suak hi. A tamzaw in amah pen Teresa Benedicta cih min tawh thei lo-in Misiangtho Edith Stein cih min bek tawh thei uh hi. Edith in kum sawm a phak khit ciangin Jew biakna nusia in Pasian a umlo mipil khat hong suak hi. Gottingen university ah Philosophy sinin 1916 kumin sang man hi. Tua Philosophy pilna tawh mihing nuntakna sungah a kisam pen thuman thutak zongin om hi.
Edith Stein in lai bu a sim na pan ama upna a mukhai nu ahi hi. Misiangtho te tangthu te sim den aa, tua pan amah in Pasian umlo mikhat hihna pan Christian te lungtup ahi Misiangtho nuntakna ngah hi. Edith Stein ii lungsim tawng a sukha pen laibu in Misiangtho Theresa of Avila ii tangthu bu hi. 1922 kumin Edith Stein in tuisawpna Sacramentu sangin Carmelite nungak siangtho sangah lut hi. Tua sang pan ama min zong Teresa Benedita of the Cross ci-in laih hi. A deihna in Misiangtho Teresa ii lampi zui in Topa Jesu ii Singlamteh pen ama nuntak hun bei dongin pua ding cihna ahi hi. Ama ii Topa Jesu singlamteh leh Misiangtho a itna in Christian te khempeuh ii etteh huai ahi hi.
Edih Stein in Speyer aom Dominican sangah a ki tuah ciangin 1922 kum dong University siama khatin lai hilh suak hi. Tua khit ciangin Cologne Carmel ah kum (4) sung om in tua pan Echt aom Carmelite zateih sangah ki tuah kik hi. Christian siadaw te ii mawhsakna a thuak Nazism te in Jew pan Christian a suak Jew mite khempeuh manin bawlsia in thah uh hi. Tua hunin Teresa Benedicta leh anau Rosa te zong ki man hi. Teresa Benedicta te unau tawh a kiman Catholic te leh Jew te in Auschwitz thong sungah a om khanbit khat sungah thahna thuak uh hi.
Teresa Benedicta pen 1987 kumin Pope John Paul II in Blessed in tangko aa, 1998 ciangin Misiangtho in ki tangko hi. Christu Singlamteh itna tawh Christian a suak mi khempeuh in Teresa Benedicta bangin “Singlamteh” ciaptehna ih bawl sial in Misiangtho te ii a citak upna tawh a nuntakna uh etteh in amaute’ tangthu sim na tawh Kha tha la ciatni.
Misiangtho Teresa Benedicta aw….kote adingin thu hong ngetsak tan.