Misiangtho Stephen Pawini (December 26)

Misiangtho Stephen in Pawlpi ngeina sungah aminthang, Deacon (7) te lak pan khat ahi hi. Pasian vangliatna tawh kidim in mitampi te lak ah vangliatna tampi bawl hi. Pilna tawh kidimin lungsim siangtho tawh agen thu te kuamah in thuak zo lo uh hi. Tua bangin asiamna hangin Greek kampau, Jew te in ha-za uh a, Stephen maizum sak nuam uh ahih manin thu khen zum ah paipih uh hi.
Ahi zongin Stephen mai, vantungmi bang in tangin “no te in na pu na pa te uh mah bangin Khasiangtho na langpang uh hi. Prophet te’ bawlsiatna a thuak lo na pu na pa uh om ahi hiam?” ci-in gen hi. Tua ama thugen a za thukhen zum na sem te aheh suak lua uh a, Stephen tungah lungkim lo uh hi. Ahi zongin khasiangtho tawh a kidim, Stephen in vantung lam en to in, “En un, Vantung gam kongkhak ki hongin mihing tapa in Pasian taklam ah atu ka mu hi” ci-in, amangmuh na thu gen hi.
Ahi zongin Stephen gen thu amaute in mu lo uh ahih manin aheh uh suak a, Stephen khua pualam ah kai in, suang tawh deng ki pan uh hi. Stephen in ahih leh Pasian kiangah “Topa Jesu aw….ka kha hong lak sak ta in” (Act 7:59)ci-in ngen hi. Tua khit ciangin khukdin in Aw lianpi tawh “Pasian aw…amau te mawhna te ciamteh kei-in, (amaute na thuk kei in)” (Act 7:60) ci-in nakpi-in a kiko khit ciangin a si hi. Misiangtho Stephen pen Deacon te leh lutang natna nei te a huh misiangtho in kiciamteh hi.
Misiangtho Stephen aw…Ko te a dingin thu hong ngetsak tan.