Misiangtho Rose Of Lima Pawini. (August - 23)

Misiangtho Rose in Peru gam, Lima khua ah 1586 kumin suak hi. Rose ii a minpi pen Isabel Flores de Olivia hi a, a suahtung mahin amai lingpaak bangin hoih hiuhiau ahih manin a nu leh pa te in Rose ci-in sam uh hi. Rose te inn nasem khat in zong Rose ii amel lingpaang bangin a ki laihna thu mangmuhna khat ngah ngei hi ci-in ki gen hi.

 Misiangtho Rose pen Mst Catherine of Siena mah bangin thungetna, kidekna te ah a etteh huai mahmah khat ahi hi. Rose in kuama theih lohin ki dekna te bawl zel a, amah leh amah daan ki piakna te zong bawl thei zel hi. Amah pen amel hoih mahmah nungak khat hi a, tangval tampi te in tenpih nuam uh hi. Tua bangin tangval te hoihsakna te in Rose a lungkia sak mah mah ahih manin a sau ditdiat a sam met tan in amel a siat theih na dingin zasan tawh zutin a khut te ah thong zut gawp hi.

Rose in thungetna, antan na te tam vei bawl sem sem in kisikkikna bawl a sem sem banah a lup ciang nangawnin lingkual bawlin tua lingkual a lutung ah khu in ihmu zel hi. Tua banah khat vei vei ciangin amah leh amah mawh na daan ki pia in a khut te mei tawh hal thei zel lai hi.

Nikhat, a pa in suang manpha a tawh na pan buai na khat piang ahih manin a hau mah mah amau innkuan pen zan khat thu in mizawng hong suak uh ahih manin Rose in a nu leh a pa te, sum leh paai haksatna te a huh nading in a huan sungah nisim nasem in nitak ciangin puankhui zel hi. A nu leh pa te in a pasal neih nading a vaihawm uh ciangin Rose in tua pasal neih nading tawh a ki pelh zawh nading in kum (10) sung hanciam hi.

Aman puankhui, puanphan cih te semin a innkuanpihte kisapnate panpih a, a huan nunglamah buukno khat lamin tua lai ah kidekna tawh omin thungen den hi. Sun hunsungin mizawngte kiangah huhna bawl zel a, Siangtho Pumpi mai ah nai tampi sung tu-in Siangtho Pumpi bia den hi.

Kum 20 aphak ciangin a innkuanpihte phal lohpi mahin St. Dominican nungak siangtho sangah lut hi. Nungak siangtho asuah khit ciangin aman an ne lo-in kidekin akawng sikkhau tawh ngakin sik linglukhu alu tungah khu hi. Tua lai ah kidekna bawl zel ahih manin a nung lam ciangin sa nek nopna lungsim om nawnlo in a sawt ciangin sa ne nawn vet lo-in meh teh meh gah te bek ne hi.

Rose in ama upna akisiat nading, ama siangthona a kisiat nadingin a ki ze-et na te khempeuh zo in Topa in amah tawh om khawm den hi cih lak khia zo hi. Ama kideknate pen mawhnei mite leh gimnaneu a om khate adingin ap den hi. Ama nuntak hun nunung lam ciangin Rose in tagah naupangte, pi teek puteek te leh cina te kep nading in a inn mah ah inn dei khat lamsak in ama nuntakna pen kipiakkhiatna te tawh beisak hi.

1617 kum, ama kum 31 in Rose si aa, Pasian vangliatna tampite lakkhia hi. Amah pen mi dangte tungah huhna cih nasepna apan masa pen hi ci-in pawlkhatte in gen uh hi. Misiangtho Rose pen puankhuite leh khauphante ahuh Misiangtho in ki ciamteh hi.

Misiangtho Rose Mary aw...ko te adingin thu hong ngetsak tan.