Misiangtho Rose Of Lima

Misiangtho Rose in Peru gam, Lima ah 1586 kumin suak hi. Aminpi Isabel Flores hi a, Christmas hanthotna asan ciangin Rose Marie cih min la hi. Amau innkuan pen azawngkhal mahmah hi a, amah Misiangtho Catherine bangin thungetna, kidekna te ah a etteh huai mahmah khat ahi hi.

Aman puankhui, puanphan cih te semin a innkuanpihte kisapnate panpih hi. Amau huan nunglamah buukno khat lamin tua lai ah kidekna tawh omin thungen den hi. Sun hunsungin mizawngte sungah huhna bawl zel hi. Siangtho Pumpi mai ah nai tampi sung tu-in Siangtho Pumpi bia den hi. Ama mawhsutna Siampipa in nisimin Siangtho Pumpi san theihna phalna pia hi.

Kum 20 aphak ciangin a innkuanpihte phal lohpi mahin St. Dominican sangah lut hi. Nungak siangtho asuah khit ciangin aman an ne lo-in kidekin akawng sikkhau tawh ngakin sik linglukhu alu tungah khu hi.

Ama upna akisiat nading, ama siangthona a kisiat nadingin a ki ze-et na te khempeuh zo in Topa in amah tawh om khawm den hi cih lak khai zo hi. Ama kideknate pen mawhnei mite leh gimnaneu a om khate adingin ap hi.

1617 kum, ama kum 31 in si aa, Pasian vangliatna tampite lak hi. Amah pen mi dangte huhna nasepna apan masa pen hi ci-in pawlkhatte in gen uh hi. Rose pen puankhuite leh khauphante ahuh Misiangtho in ki ciamteh hi.