Misiangtho Robert Bellarmine Pawini. (September- 17)

Misiangtho Robert Bellarmine in 1542 kumin Italy gam, Montepulciano khua ah suak hi. Kum (18) aphak ciangin a Pa phalna ngah lo pi mah in Jesuit ki pawlna sang ah lut hi. Siampi suahna a ngah zawh kum (7) khit ciangin ama siangtho na leh siamna hangin Roma a om College sang khat ah sang ukpi za ki pia hi. Catholic upna a dal ahi, a ma lai gelh te sung pan ki nial na cih lai bu in a min thang pen laibu khat ahi hi.
Tua lai bu sungah Laisiangtho ii thuthukna leh Pawlpi’ pupa te thu ki gelh aa, Protestant tampi in zong Robert Bellarmine ii lai gelh pen mihing khat ii gelh ding na ngawnin um zo lo liang uh hi. Landon a om laibu zuak khat in a dang lai bu te sangin Siadawpa gelh laibu pan sum tampi ka ngah zaw hi ci hi.
Robert Bellarmine in a minthang Pasian thu hilhna laibu te zong gelhin tua te zong ki deih thei mahmah hi.
1598 kumin Robert Bellarmine in Cardinal dingin teelna ngah aa, Trent thu ki kupna pi ii khentatna te sem khia hi. Amah in Vatican ah za lian khat in a om hangin Pongmoh leh Lothangkang bek ne aa, ama khan suanga kongkhak puan te mizawngte pia hi. Kum (4) a sawt khit ciangin Capua khua ii Siadaw dingin za piakna ngah hi. Siadaw a suah khit ciangin Robert Bellarmine in ama lai gelh na khawlin khangno khat bangin hanciam tak in Pasian thu tangko hi. Tua zawh ciangin Pope Paul V na in Roma ah sam kik aa, 1620 kumin si hi.

Misiangtho Robert Bellarmine aw…ko te adingin thu hong ngetsak tan.