Misiangtho Rita of Cascia Pawini. (May 22)

St.Rita’ nu leh pate Italy gam, Umbria ah teeng hi. A nu leh a pate in amau a sih khit ciangin a tanu uh muan leh suan nei loin amah bek a om ding lunghimawh uh ahih manin Rita kum (12) a phak hunin tangvak khat tawh kiteengsak hi.
A lawmpa tawh a kiteen kum (18) sungin tapa nih nei uh hi. Pasian’ thu a upna hangin a pasal in St. Rita zahpihin simmawh bawl lua ahih manin a nuntakna ah nopsakna nei ngeilo hi. A diakdiakin zu a kham ciangin huaisia pen hi. A tapa nih tawh Rita nisimin kikhawm uh a, Missa a ngai den uh hi. Pasian bek muangin thungen den ahih manin a thungetna Topa’n a dawng hi. A pasal Ferdinand a gamtat hong kikhel-a a innkuan sung uh hong nop mahmah hi.
A beisa hun-a mi tawh a kilem lohna hangin Paul Ferdinand mi’ khutlum-in a si hi. A tapate-gel in a pa a thatte’ tungah a pa’ phu la-in a thahkik sawm uh hi. Tua ahih manin Rita a lunghimawh mahmah hi. A tate-gel in mawhna lianpi bawl-a meikuangpi sung a tun ding uh sangin sisak baihzaw in, ci-in Pasian’ kiangah thu a ngen hi. Topa in a thungetna dawng-a, a tate-gel mawhna lian a bawl ma-un a si uh hi. Amaute-gel meikuangpi sung tung lo ding uh ahih manin Rita nuam mahmah-a, Pasian’ deihna sang siamin lungdam a ko hi.
Rita, a pasal leh a tate a sih khit ciangin Pasian’ na nakpi takin sep ding hong khentat-a, Augustinian Sister sangah lut theihna ding phalna a ngen hi. Amah nupi khinsa meigong khat ahih manin tua sangah kisang lo hi. Amah thunget hanciam semsem-a, tua ahih manin a belh ding hong om ta hi. St.Augustine leh Tolentino khua pan St. Nicholas, St. John the baptist te, Rita’ inn ah hong pai uh a, Augustinian Sister sangah amah a paipih uh hi. Tua sister sanghuang hoih takin a ki-umcip bikbek hi-a, a dai kongkhakpi uh zong limtakin a kikalh ahi hi. Ahi zongin amaute a pai uh ciangin kongkhakpite Pasian’ vangliatna tawh hong kihong-a, a meivakte u zong hong tang mahmah hi. Rita a sungah lut-a khukdinin thu a ngen hi. Sister te zong hong pai uh a, thupiangte a dong uh hi. Rita in a thupiang khempeuh a gen ciangin sister-te in a sister puante uh la-in St.Rita silhsak pah uh-a, amau tawh a omkhawm uh hi.
Rita in hizahtak a lian Pasian’ thuphate bangci thuhkik ding cih, a ngaihsunsun hi. Marches khua St. James thungente phawkin Topa Jesu’ thuak gimna lak pan khat, amah a thuaksakna dingin Pasian’ kiangah thungenin a thuu hi. Tua laitakin Topa Jesu’ lutunga lingkual pan ling khat in Rita’ taltang hong sun hi. Tua hin-a kipan amah in nakpitak natna hong thuak hi. Tua ling in a sutna, hong sawt semsem ciagnin namsia mahmah ahih manin a gamla mun khat ah, amah kituam koihta hi. Kum (76) a phak kum a sih ding ni (3) in a sap ciangin amah vehin a hehnem dingin Topa Jesu leh Tonu Maria hong pai uh hi. Rita a sih khit vantung gam a lut ciangin ama omna lui, inndei sung hong namtui mahmah a, biakinn dakte zong kuama tum, kuama sat lohpi-in hong ging hi.
1627 kum ciangin Pope Urban VIII in St.Rita misiangtho suak hi, ci-in a tangko hi. St.Rita’ luang zong a sih khit kum (150) a cin ciangin muat loin na om hi. St.Rita in a sih khit ciangin na lamdang tampi lak-a, cinate zong damsak hi. A mit mahmah uh tawh a va mu mite’ genna ah: “‘Khat veivei ciangin St.Rita’ mittangte hak zel hi,’ci uh hi. Kum tampi khit ciangin a luang zong ama thu-in, amah leh amah kihei-in a langlam na nga zel hi,” ci-in kigen hi.
Misiangtho Rita pen innkuan sung buaina te leh thumanlo pi aa simmawhna a thuak tea huh Misiangtho hi.
Misiangtho Rita aw…kote a dingin thu hong ngetsak tan.