Misiangtho Philip Neri Pawini. (May, 26)

Italy gam Firenze khua ah 1515 July 11 ni-in suak hi. Aneu tungin anu si a, anukik tawh om hi. kum 18 aphak ciangin apa in apano kiangah koih hi. A pa ngimna pen Philip Neri gamh luah sak nuam hi. Philip Neri in apano’ neih leh lam te lung gulh lo in tua gei aom, Benedictine te’ monestry sangah pai-in Siangtho Pumpi bia aa, ki lem nading leh ama Kha a dingin nitak simin thungen den hi. Kum 16 aphak ciangin Rome ah pai-in Philosophy leh Theology te va sin hi.

Tua lai takin Rome pen gamtatna a siatmah mah hun, upna aom loh hun ahi hi. A mah pen cina veh nuam mahmah in adiak diak in zato ah pai-in cinate thungetsakna, biakna lam akin lo te tawh Pasian thuleh la ki kum in ahi zongin, khangno vakvaite leh nasem khangnote tawh ki mu khawmin Pasian thu ki kum zel hi. Amah in thu agen ciangin “banghun ciangin nasephoih ki pan ding ih hi hiam” cih kammal tawh pan den hi. 1548 kum in nai 40 sung Siangtho Pumpi biakpiakna ki pan hi.
Tua ciangin ama Kha lamlak Siampipa in Siampi suak in ci-in sawl a, 1551 kum, May 30 ni-in Siampi suak hi. Tua khit ciangin Parish khat ah om in mawhsutna leh Pasian thu hilhna te nasia tak in sem hi. Amah mah in zong zingsang simin mawhsut hi. Ama kiangah Cardinalte, Bishopte, Siampite leh mi zawng mi hau tampi hong pai-in mawh hong sut zelzel uh hi. Amah pen Siangtho Pumpi azahtak mahmah khat ahi hi.

Nikhat ni-in pasal khatin, Siangtho Pumpi hong sang aa, aciah ciangin naupang nih meivak vakin anung azui sak hi. Inn atun ciangin tua mipa in bang hangin hong zui na hi uh hiam a cih leh Siampipa in hong sawl hi ci-in adawng uh hi. Tua ciangin Siampipa kiangah pai in adot leh amah in nang hong zahtak ka hi kei aa, na sung aom Siangtho Pumpi zannai lo ahih manin Topa Jesu pahtawina in ka hong sawl hi ci-in adawng kik hi.

Khat vei leuleu ciangin numei khat hongpai in Topa aw ka kam kidawm zo mahmah kei-ingh. Nisimin ka thawh pan akipan zan ka lup dong mi gensia lo-in om zo mahmah kei-ingh. Bang cih leng ka ki khel zo ding hiam a cih ciangin Siampipa in tua ahih leh tu in va ciah inla, Akpi khat lei-in, amul pen naciah kawmin bot inla lamkim, lampaam ah khia in. Tua khit ciangin, Akmul te kaikhawm kik inla kei kiangah hong paipih in a ci hi.

Tua numei zong Topa gen bang in hih aa, ahi zongin Akmul a khop kik hangin huihin na len mang ahih manin avek in a khawm zo nawn kei hi. Tua ciangin tua numeinu Siampipa kiangah hong pai kik in Topa aw, Akmul khempeuh khop kik ding pen baih lo hi, a cih leh Siampi Philip Neri in tua bang mah in na kam pan apaikhia sa, na migensiatna te pen mikhempeuh kiang tung khin ta a, ki la kik thei nawn lo hi. Tua ahih manin tu ni akipan migensiat kidawm in ci-in a hilh hi.

Tua numeinu zong Siampipa thu mangin tua ni pankipan mi gensia nawn lo in mi hoih mahmah hong suak ta hi. Tua hi a, ih kampau te ki dawmin, mi gensiatna te ih pelh zawh den na dingin Misiangtho Philip Neri beel in thu ngen ciat ni. Philip Neri pen amaitai den mikhat ahih manin aneu lai-in “Pippo Buono” Philip hoih ci-in ki sam hi. 1595 kum May 15 ni pan dam lo in gim mahmah aa, 1595 kum May 26 ni-in si hi. A sih ma in “mi khempeuh si ding hi” ci-in gen hi.
Misiangtho Philip Neri aw…Kote a dingin thu hong ngetsak tan.

Add new comment

3 + 14 =