Misiangtho Philip leh James

Nungzuipite ahi Misiangtho Philip leh James te pawini pen 563 kumin Roma khuapi ah kibawl khawm hi. Misiangtho Philip in Bethsaida khuami hi-in tui phumpa John ii nungzui khat zong ahi hi. Topa Jesu in ama nungzui dingin a sap khit ciangin Philip in Nathanael kiangah “Jesu ka mu zo hi” a ci hi. Nathanael in “Nazareth khua pan na hoih khat hong piang thei ding a hi hiam? ci-in a dong hi.
Tua ciangin Philip in “hong pai inla, hong en in” a ci hi (Jn 1: 43 – 46). Jesu in mihonpite moh tawh a ki vak lai-in Philip in “mi a vekpi in themkha khat tek a nek dingun kha guk sung thaman sum denarii zanih man khomun a cing kei ding hi”(Jn 6: 7) ci-in gen hi. A nunung nitak an nek lai-in Philip in Jesu kiangah “Topa aw, Pa hong lak lecin ka lung uh a kim ding hi” a cih leh Jesu in “Philip aw, keimah in note tawh om khawm khin napi-in kei hong thei nai lo na hi hiam? Kei hong mu mi in Pa zong a mu ahi hi. Bang hangin Kote, Pa hong lak in ci thei na hi hiam?” (Jn 14 : 8-9) ci-in dawng kik hi. Misiangtho Philip in Asian minor ah Pasian thu tangko in tua lai mah pan Singlamteh tungah thahna thuak hi.
Misiangtho James (aneu) in Alphaeus tapa hi a, Jerusalem khua ii Siadaw masa hi-in Misiangtho John laikhak (Lai Siangtho) zong at hi. AD 49, Jerusalem thu kikupna ah Christian up na a zui ahi, Jew minam ahi lo, mi namdang te in vun at ding ki sam lo hi cih Pawlpi’ khentatna pen Misiangtho James in tangko khia hi. Topa Jesu in honpa/ gumpa hi cih thu a tangko na hangin Misiangtho James pen AD 62 kumin Biakinn khum tungpan khiasuk in suangtawh deng lupna thuak hi ci-in Pawlpi ngeina ah ki ciamteh hi. Misiangtho James in asih madeuhin vantung lam en to in “Pa aw, amaute in bang sem uh cih thei lo ahih manun amaute’ mawhna na maisak in” ci-in thungen hi.