Misiangtho Peter leh Paul te Pawi ni. (June 29)

Peter in Topa Jesu ii sapna a dawngkik nungzuipi khat ahi hi. Ama min pen Simon hi in, Nga map nasep tawh nuntakna a zong mi khat ahi hi. Simon in ama neihsa khempeuh nusia in Jesu nung zui hi ci-in kiciamteh hi. Topa Jesu in amah pen Petru – Rock (suangpi) ci-in min pia hi. Tua hunlai a nasem mite mah bangin Petru in pilna sin kha lo hi.
Petru in maizum aneilo, a lungduai lo, a muh bangin a sem thei mi khat ahi hi. Amah in ngaihsun lo-in paukhia, semkhia thei hi. Huihpi a nasiat mahmah ni zan khatin Galilee bualtui ah nungzuipite in Ngunkuang tuangin lui gal lam a kan laitak un tui tunga lam pai Topa Jesu mu uh hi. Jesu ahih lam a theih ciangin tui sungah lengsukin Topa Jesu kiangah apai mi-in Petru mah ahi hi. Topa Jesu mel a kilamdang lai-in buk thum lam dingin a gen mi in zong Petru mah hi. Topa Jesu a thawhkik khit, Galilee tui gei ah apai lai in a siapa hi cih a theih ciangin Petru in a puansilh te suahkhia in tui peekin a sia pa kiangah pai pah hi.
Ngaihsutna sangin lungsim deihna in Petru ii gamtatzia te zo zaw ahih manin Petru in lungdamna ahi zongin, khasiatna te ahi zongin a tuah ciangin nuam baih/ khasia baih hi. Topa Jesu in “amah in Jerusalem ah pai in gimna a thuak nading thu nungzuipi te a gen ciangin Petru in “Topa aw, hih bangin na tungah hong pian ding Pasian in phal kei ta hen (Mt 16: 22)” ci-in gen hi. Ahi zongin Jesu in “Satan, ka nungah om in! Kei’ adingin khaktanna na suak hi. Bang hang hiam cih leh na ngaihsutna te in Pasian’ ngaihsutna hi lo a, mihingte’ ngaihsutna ahi hi (Mt 16: 23)” ci-in ki hei-in taai hi. Petru adingin bang zah takin khasiat huai ahi hiam?
Topa Jesu in zungzuipite khe a silhsak lai-in “Ka khe na sil peuhmah kei ding hi (Jn 13: 8)” ci-in Petru in nial hi. Topa Jesu in “Na khe ka sil kei leh kei tawh a kipawl lo na hi hi” ci-in dawng kik hi. Tua ciangin Petru in “Topa aw ka khe bek hi lo-in ka khut leh ka lu zong hong silsak in” ci-in ngen leu leu hi. Hi thu te ih et ciangin Petru ii lungsim in thakhat in aniampen dongah kia thei in a lungkim ciangin zong a sang pen dongah kah vat zel hi cih ki mu hi.
Petru ii thu a kigelh Laisiangtho kammalte in ama thu tawh kisai in khat peuhpeuh hong gen nuam hi. Amah in nungzuipite tangin adiing makai pi khat hi. Topa Jesu in Gethsemane huan sungah gimna thuakin thu a nget hunin Topa tawh a omkhawm nungzuipite lak ah a ki hel khat ahi hi. Topa Jesu in sihna zo in a thawhkik khit ciangin Petru ii nuntakna nakpi takin kikhel hi. A picing leh cihtakna lungsim te tawh hong kidim hi. Kha Siangtho Pasian hong kumni in ama gen Pasian thu hangin Christian upna thaksuak in man langtak in hong ki zel hi. Ama sepkhiatna hangin Jew minam ahi lo te in Christian thuzui asuah nadingin lam honsak zo hi. Amah in “Pasian in gup tuam neilo hi” ci-in gen hi. AD- 64 kumin Nero kumpi in Pawlpi a bawlsiat mahmah hun hi a, tua hun in Vatican mualtung ah Peter in Singlamteh bungbulet in thahna thuak hi.
Roma a om “a lian pen Pawlpi in a minthang mahmah nungzuipi nih ahi, Petru leh Paulu te in a phuat uh hi ci-in Irenaeus (June 28) in gen hi.
Paulu in pilna nei khat hi in, Jew minam leh Roma gam mi a la khat ahi hi. Paulu in Jerusalem Pawlpi ah vai puak nei khat bel hilo hi. Ahi zongin ama Christian upna aliatna tawh makai pi khat ahi hi. Paulu ii minpi in Saul hi aa, Pawlpi a langpang mahmah pharisee khat ahi hi. Damascus ah apaina lampi (Act 9: 18) pan kikhel hi. A kikhel khit ciangin Asiaminor leh Greek gam te ah Pasian thu tangko in pai kawikawi hi. Jerusalem ah a nunung apai na lampi pan a mipih Jew te in “Pasian a langpang pa” ci-in amah man uh hi. Paul in Roma gam mi la ahih manin ama thu Emperor in a khensat na dingin ngen hi. Roma ah thong a kiat sungin Paul in “Ka nuntakna biakpiakna in hong kizat ding hun hong tung dekta hi. Hih leitung pan ka paikhiat ding hun hong tung ta hi. Galdona hoih ka do khin a, tai kidemna ah a mong dongin ka tai zo hi. Upna thu kiptakin ka kemcing zo hi (2Tim 4: 6-7)” ci-in gelh hi. AD 64 hun in ngawngtan in thahna thuk hi.
Hi bangin a ettehhuai ahi Pawlpi makai pi nihte’ sihna leh ki vuina tawh kisai thu te Pawlpi’ tangthu in kiciamteh hi. Amaute in upna adingin amau nuntakna itsik lo takin a piakhia te ahi uh hi. Contantine kumpi in hih nungzuipi nihte kivuina han ah a lian mahmah St. Peter leh St. Paul Biakinnpi lam hi.
Misiangtho Peter leh Paul te aw…kote adingin thu hong ngetsak un.